شىڭعىس ايتماتوۆتىڭ قىزى پرەزيدەنت توقاەۆقا ۇندەۋ جاسادى

الماتى اۋەجايىندا قىرعىز جازۋشىسى شىڭعىس ايتماتوۆتىڭ كۇيەۋ بالاسى سىرعاق كەنجەباەۆ ۇستالدى.

قىرعىزستاندىق ەكس-دەپۋتاتتىڭ ايەلى شىرىن ايتماتوۆا Twitter جەلىسىندەگى پاراقشاسىندا كەنجەباەۆتىڭ 20 جەلتوقسانعا قاراعان ءتۇنى جوعالىپ كەتكەنىن جازدى. ودان ەشقانداي حابار بولماعان. وسىعان بايلانىستى شىرىن ايتماتوۆا قازاقستان پرەزيدەنتى قاسىم-جومارت توقاەۆقا ۇندەۋ جاساعان. كەيىنىرەك ايتماتوۆانىڭ كۇيەۋىنىڭ الماتىدا ۇستالىپ، بىشكەككە جىبەرىلگەنى بەلگىلى بولدى.

قىرعىزستاننىڭ ءىىم وكىلدەرى بىشكەك تۇرعىنى ۆيكتور گاۆريشەۆتىڭ سىرعاق كەنجەباەۆقا شاعىمدانعانىن ايتىپ وتىر. ەر ادام 2013 جىلى كەنجەباەۆ ارقىلى ۇلى ەگور گاۆريشەۆكە قاتىستى قوزعالعان ءىستى توقتاتىپ تاستاعانىن ايتقان.

ىشكى ىستەر مينيسترلىگىنىڭ ءباسپاسوز قىزمەتى: «وبەكتيۆ تەرگەۋ جۇرگىزىپ، وقيعانىڭ ءمان-جايىن انىقتاۋ ماقساتىندا كەنجەباەۆتىڭ ەرەجەبۇزۋشىلىقتارى ءىىم سوتقا دەيىنگى تەرگەۋ وندىرىسىنە ماتەريالدارىنا ەنگىزىلدى. ناتيجەسى بويىنشا پروتسەسسۋالدىق شەشىم قابىلدانادى»، – دەيدى.

"The Qazaq Times"