ترامپقا يمپيچمەنت جاريالاندى

اقش كونگرەسى وكىلدەر پالاتاسى ەل پرەزيدەنتى ترامپقا قارسى يمپيچمەنت جاريالاۋدى جاقتاپ، داۋىس بەردى. پرەزيدەنتكە ەكى باپ بويىنشا ايىپ تاعىلعان: ءوز بيلىگىن اسىرا پايدالانۋ جانە كونگرەسكە كەدەرگى كەلتىرۋ. بۇل تۋرالى Politico باسىلىمى حابارلادى.

دەموكراتتار يمپيچمەنت جاريالاۋدى قولداسا، رەسپۋبليكالىقتار قارسىلىق تانىتتى. ءبىرىنشى ايىپ، ياعني ءوز بيلىگىن اسىرا پايدالاندى دەگەن ۋاجگە 230 وكىل قولداپ داۋىس بەرگەن. قارسى بولعاندار سانى – 197. سونىڭ ەكەۋى دەموكرات.

ال كونگرەسكە كەدەرگى كەلتىردى دەگەن ايىپتى 229 دەپۋتات قولداپ شىقتى، قارسىلاردىڭ سانى 198. قازىر بۇل ءىس سەناتقا جىبەرىلدى. ساراپشىلاردىڭ ايتۋىنشا، ءىس سوت پروتسەسىنە دە جەتپەيدى. سەبەبى جوعارعى پالاتاداعى رەسپۋبليكالىقتار ترامپ يمپيچمەنتىنە تۇبەگەيلى قارسىلىق تانىتىپ وتىر.

كۇنى كەشە اق ءۇي باسشىسى رەسمي مالىمدەمەسىندە: «دەموكراتيالىق پارتيا باستاعان يمپيچمەنت بيلىكتە توڭكەرىس ۇيىمداستىرۋدىڭ ايلاسى دەپ بىلەمىن. وسى امالدارى ءۇشىن الداعى ساياسي دودا كەزىندە جاۋاپقا تارتىلاتىن بولادى. بۇل ادىلەتسىزدىك 3 جىلدان بەرى جالعاسىپ كەلەدى. ەسەسىنە رەسپۋبليكاشىلداردىڭ ىنتىماقتاستىعى ارتا ءتۇستى دەگىم كەلەدى»، – دەدى. ونىڭ ايتۋىنشا، پەلوسي امەريكالىق دەموكراتياعا سوعىس جاريالاپ، ەل كونستيتۋتسياسىنا نۇقسان كەلتىرىپ وتىر. سونىمەن قاتار 2020 جىلى وتەتىن پرەزيدەنتتىك سايلاۋدا جەڭىسكە جەتۋدىڭ امالىن ويلاستىرۋدا.

ترامپتىڭ يمپيچمەنتى سەناتتىڭ ۇشتەن ەكى وكىلى قولداعاندا عانا جۇزەگە اسپاق. بىراق، اقش تاريحىندا بىردە ءبىر پرەزيدەنت قىزمەتىنەن قۋىلىپ كورگەن جوق. 230 جىل ىشىندە تەك ەكى پرەزيدەنتكە عانا يمپيچمەنت جاريالانعان، بىراق ولار ايىپ استىندا ءوز قىزمەتتەرىن جالعاستىرعان. كەيبىر ساراپشىلار وسىلاردى العا تارتا وتىرىپ، سونداي-اق، اقش سەناتىندا قازىرگى كەزدە رەسپۋبليكاشىلداردىڭ ۇستەمدىك قۇرىپ وتىرعانىن ەسكەرە وتىرىپ، ترامپتىڭ قىزمەتتەن قۋىلۋى مۇمكىن ەمەس دەگەن بولجام ايتادى.

بۇگىنگە دەيىن اقش-تا ەندريۋ دجونسون جانە بيلل كلينتون يمپيچمەنت پروتسەسىنە ۇشىراعان. ەكى پرەزيدەنتتىڭ لاۋازىمىن شەكتەۋ سەناتتاعى تالقىلاۋلاردىڭ قورىتىندىسى بويىنشا اقتالعان. ال امەريكا تاريحىندا «سۇستى ادام» اتانعان ريچارد نيكسون ۋوتەرگەيت جانجالىنا بايلانىستى يمپيچمەنت ارقىلى وتستاۆكاعا كەتكەن بولاتىن.

"The Qazaq Times"