ءبىلىم جانە عىلىم مينيسترلىگى قوسىمشا تەكسەرۋ جۇمىستارىن جۇرگىزە كەلە 5 جوعارى وقۋ ورنىنىڭ ليتسەنزياسىن ۋاقىتشا توقتاتۋ تۋرالى شەشىم قابىلدادى.

ءبىلىم مينيسترلىگى التى جوو-دان بۇزۋشىلىقتار انىقتاعان. اسحات ايماعامبەتوۆ مينيسترلىكتە وتكەن ءباسپاسوز ءماسليحاتىندا: «ءبىز بۇعان دەيىن ەلىمىزدە 5 جوو ليتسەنزياسىنىڭ ۋاقىتشا توقتاتىلعانىن حابارلاعان بولاتىنبىز. بۇگىندە جوو-نا قوسىمشا تەكسەرۋ جۇمىستارىن جۇرگىزۋدەمىز، سونىڭ ناتيجەسىندە تاعى 5 جوو-نىڭ ليتسەنزياسىن ۋاقىتشا توقتاتۋ تۋرالى شەشىم قابىلدادىق. شەشىممەن كەلىسپەيتىن جوو-نىڭ زاڭ بويىنشا شاعىمدانۋعا 10 كۇن ۋاقىتى بار. ەگەر شاعىم تۇسپەسە نەمەسە شاعىمدانعان جاعدايدىڭ وزىندە سوت شەشىمدى وزگەرتپەسە ءبىز ولاردىڭ اتاۋلارىن جاريالاي الامىز. جالپى جوو بويىنشا پروبلەمالار جەتكىلىكتى. انىقتالعانداي، 1 كۋرسقا 5 ستۋدەنت قابىلدانسا، 4 كۋرستى 150 ستۋدەنت ءبىتىرىپ شىعادى. دەمەك 2,3 كۋرستاردا جاۋاپسىز ۋنيۆەرسيتەتتەر وقۋدان شىعىپ قالعان ستۋدەنتتەردى قابىلدايدى. مەملەكەت باسشىسىنىڭ تاپسىرماسىنا سايكەس، ءبىز جوو-نا دەگەن تالاپتى كۇشەيتتىك جانە جوعارى ءبىلىم بەرۋ سالاسىن رەتتەۋدىڭ جاڭا مەحانيزمدەرى ەنگىزىلەتىن بولادى»، — دەدى.

ايتا كەتەيىك، كۇنى كەشە قر پرەزيدەنتى قاسىم-جومارت توقاەۆ ديپلوم تاراتاتىن كونتورعا اينالعان جوو-لارعا قاتاڭ شارالار قابىلدانۋى ءتيىس دەپ تاپسىرما بەردى.

"The Qazaq Times"