قر ۇلتتىق بانكى. كورنەكى سۋرەت. فوتو: اشىق دەرەككوز

پرەزيدەنت توقاەۆ ۇلتتىق بانكتى قايتا قۇرۋ تۋرالى جارلىققا قول قويدى. 2020 جىلدىڭ 1 قاڭتارىنان باستاپ قارجى نارىعىن رەتتەۋ جانە دامىتۋ اگەنتتىگى تاراپ، قايتا قۇرىلاتىن بولادى.

جاڭا مەملەكەتتىك ورگان الماتى قالاسىندا ورنالاسادى. اگەنتتىك قارجىلىق قىزمەتتەردى تۇتىنۋشىلاردىڭ قۇقىقتارىن قورعايدى، قارجىلىق تۇراقتىلىقتى قامتاماسىز ەتەدى جانە قارجى نارىعىن رەتتەيتىن بولادى. ۇيىم ازاماتتىق-قۇقىقتىق قاتىناستارعا ءوز اتىنان تۇسەدى.

جارلىقتا كورسەتىلگەندەي، اگەنتتىك تىكەلەي پرەزيدەنتكە ەسەپ بەرەدى. ال اگەنتتىك توراعاسى بۇل قىزمەتكە التى جىلعا تاعايىندالادى.

قۇرىلىمى مەن شتات سانىن تەك پرەزيدەنت بەكىتەدى. جارلىق بويىنشا جالپى شتات سانى 547 ورىننان تۇرادى.

ۇلتتىق بانك توراعاسىنىڭ ورىنباسارى ولەگ سمولياكوۆ كوكتەمدە «قارجى سەكتورىن رەتتەۋ جونىندەگى تاۋەلسىز ورگان قۇرۋ تۋرالى زاڭ جوباسىن» تانىستىرىپ، پارلامەنت ونى العاشقى وقىلىمدا-اق ءبىراۋىزدان ماقۇلداعان. «ۇلتتىق بانك پەن اگەنتتىكتىڭ قىزمەتى تياناقتى تۇردە، ونىڭ ىشىندە باسقارۋ ورگاندارىندا ءوزارا وكىلدىك ەتۋ ارقىلى ۇيلەستىرىلەدى. اگەنتتىك رەسپۋبليكالىق بيۋدجەت ەسەبىنەن قارجىلاندىرىلادى. ەڭبەكاقى تولەۋ جۇيەسىن قازاقستان رەسپۋبليكاسىنىڭ ۇكىمەتى بەكىتەدى، ال قىزمەتشىلەردىڭ مارتەبەسى ۇلتتىق بانك قىزمەتشىلەرىنىڭ مارتەبەسىندەي بولادى»، – دەپ حابارلاعان سمولياكوۆ. ال بانك توراعاسى ەربولات دوساەۆ اتالعان اگەنتتىكتى قۇرۋعا 10 ملرد تەڭگە سۇراعان. ۆەدومستۆو قارجى نارىعىن رەتتەۋ جانە دامىتۋ، سونداي-اق تۇتىنۋشىلاردىڭ قۇقىقتارىن قورعاۋ فۋنكتسيالارىمەن اينالىسادى.

بۇرىن قازاقستاندا قارجى نارىعى مەن قارجىلىق ۇيىمداردى رەتتەۋ جانە قاداعالاۋ اگەنتتىگى (ققا) جۇمىس ىستەدى. 2011 جىلدىڭ ساۋىرىندە جويىلىپ، مەملەكەتتىك اگەنتتىكتىڭ فۋنكتسيالارى مەن وكىلەتتىكتەرى ۇلتتىق بانككە بەرىلدى.

"The Qazaq Times"