اقش پرەزيدەنتى دونالد ترامپ جانە جاپونيا پرەمەر-ءمينيسترى سيندزو ابە. فوتو: https://storage.googleap

جاپونيا ۇكىمەتى اقش-تىڭ اسكەري الەۋەتىن، يادرولىق قارۋعا قاتىستى مالىمدەمەلەرىن قولدايدى.

24 قاراشادا ريم پاپاسى فرانتسيسك حيروسيماداعى الەم پاركىنە بارعان كەزدە اسكەري ماقساتتا اتوم ەنەرگياسىن پايدالانۋ، سونداي-اق يادرولىق قارۋعا يە بولۋ امورالدى دەپ اتاعان. فرانتسيسكتىڭ پىكىرىنە جاپونيا بيلىگى جاۋاپ بەردى.

توكيودا وتكەن ءباسپاسوز ءماسليحاتىندا مينيسترلەر كابينەتىنىڭ باس حاتشىسى ەسيحيدە سۋگا: «يادرولىق قارۋدى قوسا العاندا، اقش-تىڭ اسكەري كۇشتى نىعايتۋى – قاۋىپسىزدىكتى قامتاماسىز ەتۋدىڭ بىردەن-ءبىر ءتاسىلى. قازىرگى ۋاقىتتا يادرولىق قارۋسىزدانۋدى ىلگەرىلەتۋ قاجەت»، – دەپ اتاپ ءوتتى.

2017 جىلى قىركۇيەكتە سولتۇستىك كورەيانىڭ بالليستيكالىق زىمىرانى جاپون كەڭىستىگىنەن ۇشىپ وتكەننەن كەيىن، جاپونيا قورعانىس مينيسترلىگىنىڭ تالاپتارى بويىنشا، جاڭا زىمىران قورعانىسى تەحنولوگياسىنا 1,6 ميلليارد اقش دوللارى جۇمسالدى. بۇل سولتۇستىك كورەيانىڭ سۋ استىندا ورنالاسقان زىمىراندارىن جىلدام تابۋعا بولاتىن راداردى دا ءوز ىشىنە قامتيدى. سونداي-اق، بالليستيكالىق زىمىراندارعا قارسى تۇرا الادى. سول ۋاقىتتان بەرى كحدر جاپون تەڭىزىنە قاراي بىرنەشە مارتە زىمىران ۇشىرىپ كەلەدى.

رەسمي مالىمەتتەر بويىنشا، قازىرگى ۋاقىتتا اقش-تا 3800-دەن استام يادرولىق وق تۇمسىق بار. ولاردىڭ اراسىندا 1750 داناسى بالليستيكالىق جانە ورتا-قىسقا قاشىقتىقتاعى تاسىمالداۋشى زىمىراندارعا ورناتىلعان. ال، قالعانى يادرولىق رەزەرۆ رەتىندە ساقتالۋدا. اقش تۇركيا، بەلگيا، يتاليا، گەرمانيا جانە گوللانديا قاتارلى ەلدەردەگى اسكەري بازالارىندا B-61 اتوم بومباسىنىڭ 150 داناسىن ورنالاستىرىلعان. 2019 جىلى اقش يادرولىق ارسەنالىن دامىتۋعا 24 ملرد دوللار قارجى بولىنگەن.

"The Qazaq Times"