ءىىم ەرلان تۇرعىمباەۆ. فوتو: ءىىم

ىشكى ىستەر ءمينيسترى ەرلان تۇرعىمباەۆ اۋماقتىق پوليتسيا دەپارتامەنتتەرى باسشىلارىمەن كامەلەتكە تولماعانداردىڭ قاۋىپسىزدىگى ماسەلەسىنە قاتىستى كەڭەس وتكىزدى.

ءىىم-ءنىڭ ءباسپاسوز قىزمەتىنىڭ حابارلاۋىنشا, اقمولا، اقتوبە، الماتى، اتىراۋ جانە جامبىل وبلىستارىنىڭ پوليتسيا دەپارتامەنتى باسشىلارى سىنعا ۇشىرادى. كەڭەس قورىتىندىسىندا بىرقاتار باسشى قاتاڭ تارتىپتىك جازاعا تارتىلدى.

اتاپ ايتقاندا، جامبىل وبلىستىق پوليتسيا دەپارتامەنتىنىڭ باستىعى ارمان ورازاليەۆكە قىزمەتكە ساي ەمەستىگى ەسكەرتىلدى. اقتوبە وبلىستىق پوليتسيا دەپارتامەنتىنىڭ باستىعى اتىعاي ارىستانوۆقا قاتاڭ سوگىس جاريالاندى. الماتى وبلىستىق پوليتسيا دەپارتامەنتىنىڭ باستىعى مۇرات ۇرىمحانوۆقا بۇعان دەيىن دە قاتاڭ سوگىس جاريالانعان ەدى.

تاراز قالالىق پوليتسيا باسقارماسىنىڭ باستىعى ارداق ماديماروۆ قىزمەتىنەن بوساتىلدى. بۇعان قوسا، تاراز قالالىق پوليتسيا باسقارماسى قىزمەتتەرىنىڭ باسشىلارى جازالانىپ، مەكتەپ ينسپەكتورى ىشكى ىستەر ورگاندارىنان قۋىلدى.

بارلىق وڭىرلىك باسشىلارعا جەرگىلىكتى اتقارۋشى ورگاندارمەن بىرلەسىپ، قوردالانعان پروبلەمالى ماسەلەلەردى تىڭعىلىقتى سارالاپ، شەشۋ تاپسىرىلدى.

ولاردىڭ قاتارىندا ۋچاسكەلىك پوليتسيا مەن مەكتەپ ينسپەكتورلارىنىڭ جۇمىسىن ۇيىمداستىرۋدى وزگەرتۋ، ولاردىڭ ءبىلىم بەرۋ ۇيىمدارىمەن جانە اكىمدىكپەن ءوزارا ءىس-ارەكەتى، كۇزەت ۇيىمدارىن مەكتەپتەر مەن بالاباقشالارداعى قاۋىپسىزدىكتى قامتاماسىز ەتۋگە جۇمىلدىرۋ ماسەلەلەرى بار.

«اۋماقتىق دەپارتامەنتتەردىڭ باسشىلارىنىڭ نازارىن پوليتسيانى باعالاۋدىڭ نەگىزگى ينديكاتورلارىنىڭ ءبىرى كامەلەتكە تولماعانداردىڭ قىلمىستىق وزبىرلىقتان قورعالۋ دەڭگەيى ەكەندىگىنە اۋدارتامىن. ءدال وسىنى ادامدار بىزدەن كۇتىپ وتىر. ءبىز ولاردىڭ قاۋىپسىزدىگىن قامتاماسىز ەتۋگە مىندەتتىمىز»، – دەدى تۇرعىمباەۆ.

بۇعان دەيىن بۇرىن زورلىق ايىبىمەن ءىستى بولعان ەر ادام تارازداعى №6 مەكتەپتىڭ اجەتحاناسىندا 7-سىنىپ وقۋشىسىن زورلادى دەگەن اقپارات جەلىدە جەلدەي ەسىپ، قوعامنىڭ قىزۋ تالقىسىنا تۇسكەن بولاتىن. ەلدى تىكسىنتىپ، اتا-انالار قاۋىمىن ۋايىمعا سالعان جاعاۇستارلىق جاعدايدان سوڭ جامبىل وبلىستىق ءبىلىم باسقارماسىنىڭ باسشىسى، مەكتەپ ديرەكتورى، مەكتەپ ينسپەكتورى جانە بىرنەشە مۇعالىم مەن ءبىلىم وشاعىنىڭ قىزمەتكەرى جۇمىستان شىعارىلدى. جاپپاي وتستاۆكانىڭ ءىزىن الا ەل پرەزيدەنتى توقاەۆتىڭ بۇيرىعىمەن تاراز قالاسىنىڭ اكىمى قايرات دوساەۆتى ورنىنان بوساتىلدى.

"The Qazaq Times"