ەلدەگى كەزەكتەن تىس پارلامەنتتىك سايلاۋعا قاتىساتىن بريتاندىق ليبەرال-دەموكراتتار پارتياسى جەڭىسكە جەتكەن جاعدايدا Brexit-ءتى توقتاتپاق. بۇل تۋرالى ليبەرالدار باسشىسى دجو سۆينسون ۇسىنعان پارتيالىق مانيفەستكە سىلتەمە بەرگەن ۆۆس اعىلشىن ءبولىمى حابارلادى.

12 جەلتوقساندا وتەتىن سايلاۋ ناتيجەلەرى بويىنشا اتالعان پارتيا بيلىككە كەلسە، جاڭا ۇكىمەت ۇلىبريتانيانىڭ ەۋروپالىق قاۋىمداستىقتان شىعۋى تۋرالى 2017 جىلى ەو ۇسىنعان حابارلامانىڭ كۇشىن جويادى. سونىمەن بىرگە، بۇل ساياسي كۇش Brexit ماسەلەسى بويىنشا ەكىنشى رەفەرەندۋم وتكىزبەيتىنىن ايتتى.

ليبەرالدى-دەموكراتيالىق پارتيا وكىلدەرى كليماتتىڭ وزگەرۋىنە قارسى جوبالار ۇسىنىپ، ەنەرگيا تۇتىنۋ قۇرىلىمىنداعى ەنەرگيا ۇلەسىن 2030 جىلعا قاراي 40%-دان 80%-عا جەتكىزۋگە ۋادە بەرىپ وتىر. سونىمەن قاتار، پارتيا ۇلتتىق دەنساۋلىق ساقتاۋ جۇيەسىنە جىلىنا قوسىمشا 7 ميلليارد فۋنت ستەرلينگ (9 ميلليارد دوللار) سالدۋى كوزدەپ وتىر. ساراپشىلاردىڭ پىكىرىنشە، ليبەرال-دەموكراتتاردىڭ ەكى جاستان باستاپ بارلىق بالالاردى بالاباقشالارعا تەگىن ورىندارمەن قامتاماسىز ەتۋ جوسپارىن جۇزەگە اسىرۋ ءۇشىن جىلىنا تاعى 13 ميلليارد فۋنت ستەرلينگ (17 ميلليارد دوللار) قاجەت بولادى. سونىمەن قاتار، پارتيا ۇلىبريتانيا قابىلداعان بوسقىندار سانىن ەكى ەسەگە ارتتىرۋعا ۋادە بەردى.

نەگىزىنەن Brexit بويىنشا كەلىسسوزدەر 2017 جىلدان بەرى جالعاسىپ كەلەدى. 2016 جىلعى رەفەرەندۋم بويىنشا ۇلىبريتانيا 29 ناۋرىزدا ەۋروپالىق وداق قۇرامىنان شىعۋى ءتيىس بولاتىن. الايدا، تاراپتار ورتاق كەلىسىمگە كەلە الماعاندىقتان، Brexit ۋاقىتى ەكى رەت كەينگە شەگەرىلگەن. تاياۋدا ءمالىم بولعانداي، رەسمي بريۋسسەل ۇلىبريتانيانىڭ ەۋرووداق قۇرامىنان 31 قازاندا شىعاتىنىن ايتتى. بۇل قادام دا كەزەكتى مارتە ءساتسىز اياقتالعاندىقتان، Brexit مەرزىمى ۇزارتىلدى. ەندى ۇلىبريتانيانىڭ وداق قۇرامىنداعى ساياسي شەشىمى الدا كەلە جاتقان كەزەكتەن تىس پارلامەنتتىك سايلاۋدان كەيىن ءمالىم بولادى.

"The Qazaq Times"