ەۋرووداق ەلدەرى مەن ەۋروپارلامەنت بىرىگىپ، 2020 جىلعا ارنالعان جاڭا بيۋدجەتتى بەكىتتى. دەگەنمەن تۇركياعا كومەك بۇرىنعىدان كەمىگەن. سول سەبەپتى رەسمي انكارا ءسۇريادا «بەيبىتشىلىك قاينارى» اسكەري وپەراتسياسىن قايتا باستاپ، ەلگە اعىلعان بوسقىندار ءۇشىن كارى قۇرلىققا جول اشامىز دەپ ەسكەرتۋ جاساپ وتىر.

وسىعان بايلانىستى رەسمي مالىمدەمە جاساعان تۇركيانىڭ سىرتقى ىستەر ءمينيسترى مەۆليۋت چاۆۋشوگلۋ: «ەگەر ءبىز قاجەتتى ناتيجەگە قول جەتكىزبەسەك، «بەيبىتىشىلىك قاينارى» وپەراتسياسىن قايتا باستايمىز. باسقا امال جوق. سەبەبى رەسەي مەن كۇرد جاساقتارى بەرگەن ۋادەلەرىن ورىنداماي كەلەدى. شەكارالاس اۋماقتان كەلەتىن تەرروريستتىك قاۋىپتى قالايدا سەيىلتۋىمىز كەرەك»، — دەدى.

بۇۇ وكىلدەرى تاراتقان رەسمي مالىمەت بويىنشا سيريانىڭ سولتۇستىگىندە وق اتپاۋ كەلىسىمى ورناتىلعالى وڭىردە اسكەري ارەكەتتەر ازايعان. بىراق اس-ەل-ەين جانە تەل-ابيادتا قاقتىعىستار ءالى بولىپ جاتىر. قارۋلانعان توپتاردىڭ شابۋىلى مەن اۋە سوققىسىنان 49 بەيبىت تۇرعىن كوز جۇمعان. سيريا اۋماعىنداعى شيەلەنىستەر حالىقتى قاجىتتى. 11 ميلليون ادام كومەككە ءزارۋ.

ەۋرووداق بيۋدجەتتە باسىمدىقتى جۇمىسسىزدىقپەن كۇرەسكە، كليماتتىڭ وزگەرۋىنە بەرىپ وتىر. جالپى قارجى 168, 7 ملرد ەۋرونى. وتكەن جىلمەن سالىستىرعاندا بۇل قاراجات 1,5%-كە كوپ. دەگەنمەن ەۋرووداققا ۇمتىلعان تۇركياعا دەگەن كومەك 85 ميلليون ەۋروعا قىسقارعان. ەۋروپالىق وداقتىڭ بيۋدجەت بويىنشا كوميسسارلارى تۇركيامەن ماسەلەگە قاتىستى جاق اشپاسا دا، بولىنگەن قارجىنىڭ ەو ەلدەرى ءۇشىن ءتيىمدى ينۆەستيتسيا بولاتىنىن ايتىپ وتىر.

2016 جىلى ەۋروپالىق وداق پەن تۇركيا ورتاق شەشىمگە كەلگەن. ارنايى كەلىسسوزگە سايكەس، انكارا ميگرانتتاردىڭ ەۋروپا ەلدەرىنە قونىس اۋدارماۋىن قاتاڭ قاداعالاسا، ەو تۇركياعا 6 ملرد ەۋرو كولەمىندە قارجى بەرۋى ءتيىس بولاتىن. كەيىننەن ەردوعان وداق تاراپىنان تەك 3 ملرد ەۋرونىڭ بولىنگەنىن مالىمدەدى

اتالعان ماسەلەگە بايلانىستى بيىل 6 قىركۇيەكتە انكارا ەۋروپا ەلدەرىنەن «لوگيستيكالىق قولداۋ» كۇتەتىنىن ايتىپ، ەل پرەزيدەنتى: «ەگەر ميگرانتتاردى ورنالاستىرۋعا ەۋروپا جانە حالىقارالىق ۇيىمداردان كومەك بولماسا، تۇركيا بوسقىنداردى سول جاققا جىبەرۋگە ءماجبۇر. سۇريالىق باۋىرلارىمىزدى قاۋىپسىز ورىنعا كوشىرۋ نەگىزگى ماقساتىمىز سانالادى. بىزگە قولداۋ كورسەتىڭىزدەر»، – دەگەن.

9 قازاندا تۇركيا ءسۇريانىڭ سولتۇستىگىندە «بەيبىتشىلىك قاينارى» اتالاتىن ارنايى وپەراتسيا باستاعان. تۇرىك اۆياتسياسى مەن ارتيللەرياسى كورشى ەل اۋماعىنداعى كۇرد جاساقتارىن سوققىعا الدى. اسكەري وپەراتسيانىڭ ماقساتى – لاڭكەستەرگە وڭتۇستىك شەكارادا ءدالىز قۇرۋعا جول بەرمەۋ. تۇركيانىڭ بۇل ارەكەتىنەن كەيىن اق ءۇي باسشىسى دونالد ترامپ انكاراعا ەكونوميكالىق سانكتسيا ەنگىزگەن. كەيىننەن رەسمي ۋاشينگتون تاراپتاردىڭ ورتاق كەلىسىمگە كەلگەنىن جانە سانكتسيانىڭ جويىلعانىن حابارلادى.

"The Qazaq Times"