پوليتسەيدىڭ كىسى قاققانىن ۆيدەوعا تۇسىرگەن بلوگەر جاۋاپقا تارتىلدى

پوليتسەي جۇرگىنشىنى قاققان جول اپاتى ورنىنا بارعان بلوگەردى دەپارتامەنت باسشىسى سمارتفونىن تارتىپ الىپ، ارتىنشا «اقىلعا قونىمسىز» سەبەپپەن ايىپپۇل سالىنعان.

كەشە تۇندە (قاراشانىڭ 8-ءى، ساعات 22:30-23:10 ارالىعىندا) ورال قالاسىندا مەمنومىرى 614 كر 07,  174-ءشى بورتتاعى پوليتسيا ءپاترۋلىنىڭ كولىگى جولدان ءوتىپ بارا جاتقان بويجەتكەندى قاعىپ كەتكەن. دارىگەرلەردىڭ ايتۋىنشا، جەدەل جاردەم كولىگىمەن اۋرۋحاناعا جەتكىزىلگەن 21 جاستاعى لاريسا بەيسوۆا اۋىر جاعدايدا. وبلىستىق دەنساۋلىق ساقتاۋ باسقارماسى بويجەتكەننىڭ باس سۇيەگى زاقىمدانىپ، ميى شايقالعانىن مالىمدەدى. اۋرۋحانادا ەس-ءتۇسسىز جاتقان قىزعا تۋىستارى ءالى جولىعا الماعان.

جول اپاتى بولعان جەرگە بارعان جەرگىلىكتى بلوگەر ايبولات بوكەنوۆ سمارتفونىمەن وقيعا ورنىن ۆيدەوعا تۇسىرگەن. بلوگەردىڭ سوزىنشە، ول ورالدىڭ زاچاگانسك دەپ اتالاتىن اۋدانىنا جەتكەن كەزدە زارداپ شەككەن قىزدى جەدەل جاردەم الىپ كەتكەن. ازاتتىقتىڭ حابارلاۋىنا قاراعاندا، بوكەنوۆ وقيعا ورنىنا كەلگەن وبلىستىق پوليتسيا دەپارتامەنتىنىڭ باستىعى ماحسۇتحان ابلازيموۆقا سۇراق قويعان. ءوزىن تۇسىرۋگە تىيىم سالعان پوليتسيا شەنەۋنىگى بلوگەردىڭ سمارتفونىن قولىنان جۇلىپ الىپ, قاراماعىنداعى قىزمەتكەرلەرىنە اپات بولعان جەردە تۇسىرىلگەن جازبالاردى ءوشىرىپ تاستاۋدى بۇيىرعان. بوكەنوۆتى اۋەلى مەديتسينالىق تەكسەرۋدەن وتكىزۋگە اپارعان، كەيىن زاچاگانسك پوليتسيا بولىمشەسىنە جەتكىزىپ، ۇستىنەن «پوليتسيا قىزمەتكەرىنىڭ تالابىنا باعىنباۋ» بابى بويىنشا اكىمشىلىك قۇقىقبۇزۋشىلىق تۋرالى حاتتاما تولتىرعان. بۇگىن ازاتتىققا بەرگەن سۇحباتىندا بلوگەر «مەن بوگەت جاساعان جوقپىن، سۇحبات الماقشى بولدىم» دەگەن.

بۇگىن تۇستەن كەيىن وبلىستىق پوليتسيا دەپارتامەنتىنىڭ ءباسپاسوز قىزمەتى وزىنە قاراستى قىزمەت كولىگى جول اپاتىنا ۇشىراعانىن راستادى. جۇرگىنشىنى قاققان پوليتسيا اعا لەيتەنانتى رەنات بايمۇقاشەۆقا قاتىستى قىلمىستىق كودەكستىڭ 345-بابى («جول ءجۇرىسى نەمەسە كولiك قۇرالدارىن پايدالانۋ قاعيدالارىن بۇزۋ») بويىنشا تەرگەۋ باستالعانىن حابارلاندى.

سونىمەن قاتار پوليتسيا دەپارتامەنتى بلوگەر ايبولات بوكەنوۆتىڭ «تەرگەۋگە كەدەرگى كەلتىردى» دەپ تۇسىندىرۋگە تىرىسقان. ازاماتتىق قوعام تاراپىنان «اشىقتىق پەن جاريالىلىقتان تارتىناتىن جابىق پوزيتسيالى ورگان» دەپ سىنالاتىن قۇقىق قورعاۋ ورگاندارى بەلسەندىلەردىڭ سوزىنشە، كەز كەلگەن «ەرەكشە كوزقاراسى بار ازاماتتان قىلمىسكەر جاساي الادى».

"The Qazaq Times"