اقش مەملەكەتتىك حاتشىسى مايك پومپەو 20-21 قاراشادا بريۋسسەلدە وتەتىن ناتو سىرتقى ىستەر مينيسترلەرىنىڭ كەڭەسىنە قاتىسپاق.

مەملەكەتتىك دەپارتامەنتتىڭ ءباسپاسوز قىزمەتى: «پومپەو باستاعان دەلەگاتسيا ناتو وداقتاستارىمەن جانە باس حاتشى يەنس ستولتەنبەرگپەن جەلتوقساندا لوندوندا وتەتىن ناتو باسشىلىعىنىڭ كەزدەسۋىنە دەيىن بيۋدجەتكە قاراجات ءبولۋ جانە ۇجىمدىق قورعانىستى تالقىلايدى»، — دەلىنگەن.

ناتو ءۇشىن ءوزارا ىنتىماقتاستىقپەن قاتار، لاڭكەستىك جانە ەنەرگەتيكالىق قاۋىپسىزدىك ماسەلەلەرى، تۇركيانىڭ سۇرياداعى وپەراتسياسى دا كۇن تارتىبىندە تۇرعان تاقىرىپ. بيىل 9 قازاندا تۇركيا ءسۇريانىڭ سولتۇستىگىندە «بەيبىتشىلىك قاينارى» اتالاتىن ارنايى وپەراتسيا باستاعان. تۇرىك اۆياتسياسى مەن ارتيللەرياسى كورشى ەل اۋماعىنداعى كۇرد جاساقتارىن سوققىعا الدى. اسكەري وپەراتسيانىڭ ماقساتى – لاڭكەستەرگە وڭتۇستىك شەكارادا ءدالىز قۇرۋعا جول بەرمەۋ. انكارانىڭ جوسپارىنا سايكەس سۇريالىق بوسقىندار وسى ايماقتان تۇركياعا ورالا الادى. رەسمي داماسك بۇل وپەراتسيانى اگرەسسيا دەپ اتادى، ال حالىقارالىق قاۋىمداستىقتار انكارانىڭ ارەكەتىن ايىپتادى.

17 قازاندا اقش پەن تۇركيا اسكەري وپەراتسيانى توقتاتۋ تۋرالى كەلىسىمگە كەلگەن. ترامپ تاراپتار ءوزارا كەلىسىمگە كەلگەننەن كەيىن تۇركيا سۇرياداعى كونترتەرروريستىك وپەراتسياسىن توقتاتقانىن ايتقان. «قاشىقتىعى 20 ميل (32 شاقىرىم) بولاتىن قاۋىپسىزدىك ايماعى قۇرىلدى» – دەگەن اقش پرەزيدەنتى ءسۇريا-تۇركيا شەكاراسىندا وق اتۋ توقتاتىلىپ، جاعدايدىڭ تۇراقتالعانىن ءمالىم ەتتى. تاراپتار ورتاق كەلىسىمگە كەلگەن سوڭ، ۋاشينگتون انكاراعا ەنگىزىلگەن سانكتسيانىڭ كۇشىن جويدى.

"The Qazaq Times"