رەسەي بريتان ساياساتىنا كيلىككەن بولۋى مۇمكىن دەگەن مالىمدەمە اعىلشىن ەلىنىڭ پارلامەنتىندە قىزۋ تالقىعا مۇرىندىق بولدى. اتالعان مالىمدەمەدە، رەسەيلىك 9 قالتالى كاسىپكەردىڭ «برەكسيتتى» جاقتاعان كونسەرۆاتورلار پارتياسىن جانە ساياساتكەرلەرىن قارجىلاندىرعانى ايتىلعان.

بۇنداي مالىمەت ەڭ الدىمەن وتكەن اپتادا Sunday Times باسىلىمىندا جازىلعان. باسىلىم اشىق كورسەتىلمەگەن اقپارات كوزدەرىنىڭ مالىمەتىنە سۇيەنە وتىرىپ جازعان بولاتىن. پرەمەر-مينيستر بوريس جونسون (دجونسون)  مالىمەتتى سايلاۋدان بۇرىن جاريالاۋدان باس تارتتى. بۇل ارەكەتى ونىڭ ساياسي قارسىلاستارىنا ۇنامادى. ولار: «جونسون سايلاۋشىلاردان ءبىر نارسەنى جاسىرىپ وتىر»، – دەپ ايىپتاۋدا.

بىراق، اتالعان ماقالادا ەسىمدەرىن اتاعان رەسەيلىك كاسىپكەرلەردىڭ ەكەۋى BBC-گە بەرگەن سۇحباتىندا باسىلىمدى اۋىر سىنعا العان. وزدەرىنە تاعىلعان بۇل ايىپتى جالا جابۋ رەتىندە باعالاعان.

شىن مانىسىندە، بريتان پارلامەنتىندەگى قاۋىپسىزدىك جانە بارلاۋ كوميتەتى 2017 جىلى ەو-دان شىعۋ تۋرالى رەفەرەندۋم كەزىندە رەسەيدىڭ كيلىگۋى تاقىرىبىنداعى مالىمدەمەنى بىرنەشە اي بويى دايىنداعان بولاتىن. مالىمەتتەر الداعى سايلاۋعا دەيىن جاريالانادى دەپ كۇتىلگەن، بىراق ولاي بولمادى. بوريس جونسون مالىمەتتەردى سايلاۋدان كەيىن جاريا ەتەتىنىن ءبىلدىردى.

وسىعان قاراپ كەيبىر ساراپشىلار بۇل قۇجاتتا سايلاۋ ناتيجەسىنە ىقپال ەتەتىن مالىمەتتەر بولۋى مۇمكىن دەپ بولجايدى.

“The Qazaq Times”