«قاماۋدان قاشقان» بەلسەندى دۋلات اعادىل تابىلدى

بۇگىن تاڭەرتەڭ ساعات 10:00 شاماسىندا «قاماۋدان قاشتى» دەلىنگەن  استانالىق بەلسەندى دۋلات اعادىلدى باس پروكۋراتۋرا عيماراتىنىڭ الدىندا پوليتسيا قىزمەتكەرلەرى قايتا ۇستاپ اكەتتى.

ازاماتتىق قۇقىقتار مەن ساياسي بوستاندىقتاردىڭ ساقتالۋىن تالاپ ەتىپ اكىمشىلىك سوتقا تارتىلعان بەلسەندى دۋلات اعادىل قاماۋدان شىعاردان ءبىر كۇن الدىن جوعالىپ كەتكەن ەدى. كەشە اقمولا وبلىسى پوليتسيا دەپارتامەنتى ونى «يزولياتوردان قاشتى» دەپ، ۇيىنە ءتىنتۋ جۇرگىزىپ، ىزدەستىرۋ شارالارىن جۇرگىزگەن.

قاراشانىڭ 14-ءى ءبىر توپ ادام باس پروكۋراتۋرا جانە ىشكى ىستەر مينيسترلىگىنىڭ الدىنا بارىپ، دۋلات اعادىل تۋرالى اقپارات بەرۋدى تالاپ ەتكەن.

بۇگىن باس پروكۋراتۋرانىڭ الدىندا پوليتسەيلەر الىپ كەتپەي تۇرىپ اعادىل «ءوزىنىڭ زاڭسىز قامالعانىن ايتىپ، ادىلەتسىزدىككە توزبەي، سول جەردەن ءوز ەركىمەن كەتۋگە ءماجبۇر بولعانىن» ايتتى. الەۋمەتتىك جەلىدە كورسەتىلگەن تىكەلەي ەفيردە بەلسەندى «قاماۋدان قاشىپ شىعۋىنىڭ سەبەبىن» ءتۇسىندىردى:

– مەن شىنىمەن دە قاشىپ كەتتىم، قاشۋعا ءماجبۇر بولدىم. سەبەبى مەنى ءبىر ايدىڭ ىشىندە بەس رەت سوتتادى. جوعارعى سوتقا، باس پروكۋرورعا، ىشكى ىستەر مينيسترىنە حات جازدىم. بىراق ولاردان جاۋاپ كەلمەدى. سوعان قاراعاندا تسەلينوگراد اۋداندىق پوليتسيا بولىمشەسى مەنىڭ حاتتارىمدى جىبەرمەگەن سياقتى. مەنىڭ قۇقىعىم بۇزىلىپ جاتىر. الا جىپتەن اتتاعان جوقپىن، ەشكىمنىڭ اقشاسىن ۇرلاعان جوقپىن. ەشكمىدى ولتىرگەن جوقپىن، زورلاعان جوقپىن.

باس پروكۋراتۋرا الدىندا بەلسەندىلەر مەن تۋىستارى پوليتسيا قىزمەتكەرلەرىنىڭ ونى ۇستاۋىنا قارسى بولعانمەن ونى كولىككە وتىرعىزىپ، تسەلينوگراد اۋدانىنا الىپ كەتتى. سوڭعى رەت قاراشانىڭ 4-ءى كۇنى اقمول كەنتىندە پوليتسياعا باعىنباعانى ءۇشىن سوت شەشىمىمەن 10 تاۋلىككە قامالعان.

بەلسەندى دۋلات اعادىل باس پروكۋراتۋرا عيماراتىنىڭ الدىندا قايتا ۇستالدى. 15 قاراشا 2019 جىل. استانا. فوتو: الەۋمەتتىك جەلىدەن

"The Qazaq Times"