فوتو: https://i.ytimg.com

تاياۋدا قازاقستاننىڭ ەكس-پرەزيدەنتى ن.نازارباەۆ پۋتين مەن زەلەنسكي اراسىنداعى ماسەلەگە ارا اعايىندىق تانىتىپ، ولاردى استانا تورىندە كەزدەستىرمەك ويىن ۇسىنعان بولاتىن. دەگەنمەن، نورماند تورتتىگى كەزدەسۋىنە دەيىن زەلەنسكيدىڭ پۋتينمەن جۇزدەسپەك نيەتى دە، جوسپارى دا جوق سىڭايلى.

ۋكراينانىڭ سىرتقى ىستەر ءمينيسترى ۆاديم پريستايكو اۋستريالىق ارىپتەسىمەن وتكەن ءباسپاسوز ماسليحاتى كەزىندە تاراپتاردىڭ رەسمي كەزدەسۋى ۇيىمداستىرىلمايتىنىن كەسىپ ايتتى. پريستايكو سوزىندە: «ءبىز پۋتينمەن ەكىجاقتى كەزدەسۋدى جوسپارلاپ وتىرعان جوقپىز. نورماند تورتتىگى كەزىندەگى رەسمي كەزدەسۋ ءۇشىن بارلىق جاعدايلار جاسالعان. قازىر ۋكراينا نورماند تورتتىگىنىڭ ءۇش قاتىسۋشىلارىمەن كەڭەس باستادى. تاراپتار ۋكراينانىڭ شىعىسىنداعى تۇيتكىلدى ماسەلەلەرگە توقتالىپ، رەسەيمەن اراداعى بايلانىستى رەتتەۋگە كومەكتەسۋى ءتيىس»، – دەدى. ءبىر جاعىنان، بۇل جاۋاپتىڭ قازاقستاننىڭ ەكس-پرەزيدەنتى ن.نازارباەۆقا قاراتا ايتىلعانى جايلى رەسمي مالىمەتتەر جوق. دەگەنمەن، تاراپتاردىڭ الدىن الا كەزدەسۋ جوسپارلامايتىنى ءمالىم بولدى.

ۋكراينا ءسىم باسشىسى زەلەنسكي نورماند تورتتىگى كوشباسشىلارىنىڭ كەزدەسۋى بارىسىندا پۋتينمەن كەلىسسوزدەر جۇرگىزۋگە مۇمكىندىك الادى دەپ ەسەپتەيدى. سونىمەن قاتار، پريستايكو سامميت بارىسىندا ۋكراينا پرەزيدەنتىنىڭ دونباسستاعى قاقتىعىستاردى شەشە الاتىنىنا سەنىم ءبىلدىرىپ وتىر.

3 قازاندا دونباسستاعى قاقتىعىستى رەتتەۋ جونىندەگى ارنايى وتىرىستىڭ ناتيجەسى بويىنشا رەسەي وكىلى بوريس گرىزلوۆ بارلىق قاتىسۋشىلار ۋكراينا زاڭناماسىندا بەكىتۋ ءۇشىن «شتاينمايەر فورمۋلاسى» بويىنشا ارەكەت ەتۋگە كەلىسكەنىن حابارلاعان. سونىمەن قاتار، «دونەتسك جانە لۋگانسك وبلىستارىنىڭ جەكەلەگەن اۋداندارىنىڭ ەرەكشە مارتەبەسى تۋرالى زاڭدى قولدانىسقا ەنگىزۋ ءتارتىبى» تالقىلانعان.

"The Qazaq Times"