كورنەكى سۋرەت. فوتو: اشىق دەرەككوز

الماتى قالاسىنىڭ  سىبايلاس جەمقورلىققا قارسى قىزمەتىنىڭ حابارلاۋىنشا، بوستاندىق اۋدانىنىڭ سۋدياسى پارا الۋ ساتىندە ۇستالعان.

ارنايى وپەراتسيا قر جوعارعى سوتىنىڭ ىشكى قاۋىپسىزدىك جانە سىبايلاس جەمقورلىقتىڭ الدىن الۋ بولىمىمەن بىرلەسە وتىرىپ اتقارىلعان.

سۋديا ازاماتتىق ءىس بويىنشا شەشىمدى كەيىنگە قالدىرعانى ءۇشىن بۇرىن العان 3 مىڭ دوللار كولەمىندەگى پارانى سەنىم بىلدىرگەن تۇلعا ارقىلى قايتارۋ كەزىندە اشكەرەلەنگەن.

9 قاراشادا سۋدياعا قاتىستى سوتقا دەيىنگى تەرگەۋدى جالعاستىرۋعا باس پروكۋرور كەلىسىم بەردى. جەمقورلىق فاكتىسىنە قاتىستى سوت ءوز جۇمىسىن باستادى.

;feature=emb_title

وتكەن ايدا وسى تاقىلەتتەس ايىپپەن، جاڭاوزەندىك سۋديا سەيلحانوۆا 500 مىڭ تەڭگە پارا العانى ءۇشىن اقتاۋ قالالىق سوتىنىڭ ۇكىمىمەن 3 جىل مەرزىمگە باس بوستاندىعىنان ايىرىلعان ەدى.

بيىل قاڭتاردا جاريالانعان Transparency International ۇيىمىنىڭ ەسەبىندە سىبايلاس جەمقورلىقتى قابىلداۋ يندەكسى بويىنشا قازاقستان 180 ەلدىڭ ىشىندە 124-ءشى ورىنعا جايعاسقان. زەرتتەۋشى حالىقارالىق ۇيىمنىڭ اتقارۋشى ديرەكتورى ولگا شياننىڭ سوزىنشە، TI ەسەبىندە قازاقستان قارجى مينيسترلىگى قۇرىلىمىن كوررۋپتسيا جايلاعانىن، ال ىشكى ىستەر مينيسترلىگى وزىنە جۇكتەلگەن قىزمەت مىندەتىن اتقارۋعا «دارمەنسىز» ورگانعا اينالعانىن اتاپ كورسەتكەن.

Transparency International «قازىرگى كەزدە رەسەيدەن باستاپ ازەربايجانعا دەيىن، ۋكراينادان باستاپ وزبەكستانعا دەيىن كوپتەگەن ەلدەردە كوبىنە اۆتوريتارلىق باسقارۋ كەسىرىنەن دەموكراتيالىق ينستيتۋتتار مەن نورمالارعا قاتەر ءتونىپ تۇر. دەموكراتياسى ءالسىز قوعامدا كوررۋپتسيا ءورشيدى. مەملەكەتتىك سەكتورداعى كوررۋپتسيامەن كۇرەستە ساياسي ەرىك-جىگەردىڭ جوقتىعى ازاماتتاردىڭ ساياسي قۇقىقتارىن بۇزادى، سونىڭ كەسىرىنەن ادامدار كەيىن اسەرى قالاي بولادى دەپ الاڭداپ، وي-پىكىرىن اشىق بىلدىرە المايدى، شەرۋ وتكىزۋ جانە بىرىگۋ بوستاندىقتارىن پايدالانا المايدى» دەگەن ۇيىم بايانداماسىندا. ەلدەگى جەڭ ءۇشىنان جالعاسقان جەمقورلىقتان ابدەن زارەزاپ بولعان ازاماتتىق قوعام بەلسەندىلەرى «پارامەن اۋىزدانعان سوت جۇيەسى قاجىتتى، كۇن سايىن اقورداعا ادىلدىك، اقشاعا ساتىلعان «شىندىق» ءۇشىن شىر-پىر بولىپ سابىلاعان جۇرت سونىڭ دالەلى» دەپ سانايدى.

كۇنبە-كۇن ورشىگەن جەمقورلىقتىڭ «سالدارىمەن كۇرەس» قاشانعى جالعاسپاق؟ «ايران ىشكەنى قۇتىلىپ، شەلەك جالاعانى تۇتىلا قوياتىن» سىبايلاس جەمقورلىقپەن كۇرەس ساياساتىنىڭ كۋرس-باعدارىن وزگەرتۋگە اقجاعالىلاردىڭ باتىلى بارا قويار ما ەكەن؟

"The Qazaq Times"