سادر ۇيىمى اقش-قا ەسكەرتۋ جاسادى

يراكتاعى سادر قوزعالىسى مەرزىمىنەن بۇرىن ءوتۋى مۇمكىن سايلاۋعا اقش-تىڭ باقىلاۋشى بولۋىنا قارسىلىعىن ءبىلدىردى. وسىدان بۇرىن يراكتاعى ۇكىمەتكە نارازى ەرەۋىلشىلەر ەلدە مەرزىمىنەن بۇرىن سايلاۋ وتكىزۋدى تالاپ ەتكەن بولاتىن.

سادر قوزعالىسىنىڭ قازىرگى جەتەكشىسى مۋكتەدا ءاس-سادر ءبىر كۇن بۇرىن جاساعان مالىمدەمەسىندە: «اقش ەلدەگى مەرزىمىنەن بۇرىن بولۋى مۇمكىن سايلاۋعا ارالاساتىن بولسا، بۇل قۇراما شتاتتىڭ باسقىنشى ەل ەكەنىن تاعى ءبىر مارتە دالەلدەيدى. ءبىز بۇعان ءۇنسىز قالا المايمىز»، – دەدى. ءاس-سادر مالىمدەمەسىندە يراك بولاشاعىنىڭ يەسى يراك حالقى ەكەنىن ەسكەرتتى.

يراكتاعى شيىتتەردىڭ كوسەمى قاتارىندا بەلگىلى ءاس-سادر مالىمدەمەسىندە قۇراما شتاتتىڭ مۇسىلمان ەلدەرىندەگى اسكەري، ساياسي ارالاسۋىنا قارسى ەكەنىن ايتتى. سونىمەن بىرگە اقش-تىڭ سۇرياداعى ارەكەتى ميلليونداعان حالىقتىڭ تاعدىرىنا اسەر ەتكەن داعدارىسقا الىپ كەلدى دەپ باعالادى.

ايتا كەتەيىك، يراكتا 1 قازاننان بەرى نارازىلىق شەرۋلەرى، ەرەۋىلدەر جالعاسىپ جاتىر. ەلدىڭ شيىتتەر قونىستانعان ايماقتارىنان باستالعان نارازىلىق شارالارى قازىر تۇتاس يراكتى شارپىپ تۇر. ۇكىمەت كۇشتەرى مەن نارازى توپ اراسىنداعى قاقتىعىستاردان 315 ادام قازا تاۋىپ، 10 مىنان استام ادام جاراقات العان. بۇل مالىمەتتەردى يران ماجىلىسىنە قاراستى ادام قۇقىعىن قورعاۋ تۋرالى كوميتەت جاساعان. ەل ازاماتتارى قازىرگى بيلىكتى جەمقورلىق جانە ەلدى قالپىنا كەلتىرۋدەگى دارمەنسىز ارەكەتتەرى ءۇشىن ايىپتايدى.

“The Qazaq Times”