ماگاتە يراندا تەكسەرىس باستاماق

ماگاتە فوردوداعى نىسانعا بارىپ، بايىتىلعان ۋراننىڭ نۇسقالارىن تەكسەرمەك. بۇل تۋرالى اتوم ەنەرگياسى جونىندەگى حالىقارالىق اگەنتتىك مالىمدەدى.

ۇيىم وكىلدەرىنىڭ ايتۋىنشا، تەھران  باتىس ەلدەرى يادرولىق كەلىسىمدى ورىنداماسا اراكاداعى اۋىر سۋتەكتىك رەاكتوردى دا وزگەرتۋدەن باس تارتپاق. تاياۋدا يران وسى يادرولىق نىساندا ۋراندى بايىتۋ ءۇشىن جاڭا 30 تسەنتريفۋگانى ىسكە قوساتىنىن حابارلاعان بولاتىن. وسىلايشا، تەھران 2015 جىلعى يادرولىق كەلىسىم بويىنشا العان مىندەتتەردى قىسقارتۋدىڭ ءتورتىنشى كەزەڭىن باستادى.

2015 جىلى يران مەن «التىلىق» (اقش، فرانتسيا، ۇلىبريتانيا، گەرمانيا، قىتاي جانە رەسەي) ەلدەرى يادرولىق باعدارلاما بويىنشا تاريحي كەلىسىمشارتقا قول قويىپ، ناتيجەسىندە تەھرانعا (تەگەرانعا) قاتىستى سانكتسيالار جەڭىلدەتىلگەن ەدى. سونىمەن قاتار، يران قارۋعا قولدانىلاتىن ءپلۋتونيدى شىعارماۋعا، 15 جىل بويىنا 3,67%-عا دەيىن بايىتىلعان ۋراننىڭ 300 كگ-نان اسپايتىن مولشەرىن ۇستاۋعا، يادرولىق نىسانداردى قايتا جابدىقتاپ، ولاردى تەك بەيبىت ماقساتتا پايدالانۋعا مىندەت العان.

اقش بۇل كەلىسىمنەن بىلتىر مامىر ايىندا شىعىپ كەتىپ، يرانعا قارسى ەكونوميكالىق سانكتسيالاردى قالپىنا كەلتىرگەن. ەكى ەل اراسىنداعى كيكىلجىڭ ۋاشينگتون تەھراندى پەرسى شىعاناعىندا مۇناي تانكەرلەرىنە شابۋىل جاسادى دەپ ايىپتاعاننان كەيىن ۋشىققان.

"The Qazaq Times"