ترامپ يرانعا ەسكەرتۋ جاسادى

اقش پرەزيدەنتى دونالد ترامپ اق ۇيدە وتكەن ءباسپاسوز ماسليحاتىندا: «يراننىڭ ۋران بايىتۋ قورىن مەجەدەن اسىرۋى وزدەرىنە ۇلكەن قاۋىپ توندىرەدى»، – دەپ قاتاڭ ەسكەرتۋ جاسادى.

The New York Times باسىلىمىنا ترامپ: «يراننىڭ يادرولىق قارۋ قولدانۋىنا مۇلدە جول بەرمەيمىز. ەگەر ولار ۋران بايىتۋدى ارتتىرامىز دەسە، بۇل ويدى وزگەرتۋلەرىنە تۋرا كەلەدى. يراندىقتار ءۇشىن ۋران بايىتۋدىڭ ارتى جاقسىلىققا اكەپ سوقپايدى. يرانعا وسى ەسكەرتۋ جەتكىزسەڭىزدەر بولادى. ءبىز تەھراننىڭ رەجيمىن وزگەرتۋدى ماقسات ەتپەيمىز. ءبىز ورتاق كەلىسىمگە قول جەتكىزبەكپىز»، – دەپ مالىمدەدى.

«الداعى ۋاقىتتا ءبىزدى نە كۇتىپ تۇرعانىن كورە جاتارمىز. يراننىڭ سولتۇستىك كورەيا سىندى قاۋقارى بار. تەھراننىڭ ەكونوميكالىق جاعدايى قۋاتتى دەپ ەسەپتەيمىن»، – دەگەن اق ءۇي باسشىسى ۋاشينگتون مەن تەھران اراسىنداعى بايلانىستىڭ بولاشاعىنا قاتىستى جاۋاپ بەرگەن جوق. پرەزيدەنتتىڭ سوزىنشە، ەكونوميكالىق داعدارىس كۇتىپ تۇرعان يرانعا قارسى سانكتسيالار پاكەتى كۇن وتكەن سايىن كۇشەيە بەرمەك.

نيۋ-يوركتە وتەتىن بۇۇ باس اسسامبلەياسىنىڭ 74-ءشى سەسسياسىندا ەكى ەل باسشىسى اتالعان ماسەلەلەردى تالقىلاۋى مۇمكىن. دەگەنمەن، دونالد ترامپ جاقىن ارادا حاسان رۋحانيمەن كەزدەسۋدى قالامايتىنىن دا جەتكىزدى.

بيىل 8 مامىردا يران پرەزيدەنتى حاسان رۋحاني رەسمي مالىمدەمە جاساپ، يادرولىق كەلىسىمدەگى بىرقاتار تالاپتاردى ورىنداۋدى جارتىلاي توقتاتقان. كەيىننەن گەرمانيا، ۇلىبريتانيا جانە فرانتسيا ەلدەرى تەھراندى كەلىسىمدى بۇزباۋعا شاقىردى.

يادرولىق كەلىسىمگە 2015 جىلى اقش، يران، گەرمانيا، جاپونيا، فرانتسيا، ۇلىبريتانيا جانە رەسەي قول قويعان. كەلىسىمدەگى تالاپتارعا سايكەس، يرانعا ۋران قورىن 3,67%-دان اسىرا بايىتۋعا قاتاڭ تىيىم سالىنعان. الايدا، يران بىرنەشە مارتە تالاپتاردى بۇزىپ، ۋران بايىتۋ قورىن ماگاتە بەكىتكەن مەجەدەن دە اسىردى. سول سەبەپتى قۇراما شتاتتارى بىلتىر مامىردا يادرولىق كەلىسىمنەن شىعىپ، يرانعا قارسى ەكونوميكالىق ساكتسيالاردى قالپىنا كەلتىردى. ۋاشينگتوننىڭ تەھرانعا پارسى شىعاناعىنداعى مۇناي تانكەرلەرىنە شابۋىل جاسادى دەگەن ايىبىنان كەيىن، ەكى ەل اراسىنداعى كيكىلجىڭ ۋشىعا تۇسكەن.

"The Qazaq Times"