وزبەكستاننىڭ جاڭا پرەزيدەنتى العاشقى رەسمي ساپارىن قازاقستاننان باستادى

وزبەكستاننىڭ جاڭادان تاعايىندالعان پرەزيدەنتى شاۆكات ميرزييوەۆ، شەتەلدەگى العاشقى رەسمي ءىس-ساپارىن قازاقستاننان باستادى. كەشە، 23 ناۋرىز كۇنى، استانادا قازاقستان پرەزيدەنتى نۇرسۇلتان نازارباەۆ پەن وزبەكستان پرەزيدەنتى شاۆكات ميرزيوەۆ ەكى ەل ۇكىمەتىنىڭ كەڭەيتىلگەن قۇرامىمەن كەلىسسوزدەر جۇرگىزدى دەپ حابارلايدى اقوردانىڭ رەسمي سايتى.  

كەلىسسوز بارىسىندا تاراپتار كۇن تارتىبىندە تۇرعان وزەكتى ماسەلەلەر جونىندە پىكىر الماستى، سونداي-اق ەكىجاقتى ىنتىماقتاستىقتى دامىتۋدىڭ ستراتەگيالىق باعىتتارىن تالقىلادى.

– پرەزيدەنت رەتىندەگى ءسىزدىڭ العاشقى مەملەكەتتىك ساپارىڭىز ناۋرىز مەيرامىمەن جانە ەلدەرىمىز اراسىندا ديپلوماتيالىق قارىم-قاتىناستىڭ ورناعانىنا 25 جىل تولعان كەزەڭمەن تۇسپا-تۇس كەلىپ وتىر. قازاقستان وزبەكستان دەلەگاتسياسى ساپارىنىڭ جەمىستى بولۋى ءۇشىن بارلىق جاعدايدى جاساۋعا ءازىر، – دەدى مەملەكەت باسشىسى.

قازاقستان پرەزيدەنتى شيرەك عاسىرلىق ىنتىماقتاستىعىمىز اياسىندا ءتۇرلى سالاداعى 100 كەلىسىمگە قول قويىلعانىن، سونىڭ ەڭ نەگىزگىلەرى – ماڭگىلىك دوستىق تۋرالى شارت پەن ستراتەگيالىق ارىپتەستىك تۋرالى شارت ەكەندىگىن ايتتى.

نۇرسۇلتان نازارباەۆ ەكى ەل اراسىنداعى قارىم-قاتىناستى نىعايتۋعا وزبەكستاننىڭ تۇڭعىش پرەزيدەنتى ي.كاريموۆتىڭ قوسقان ۇلەسىن ەرەكشە اتاپ ءوتتى.

– تاريحىمىزدىڭ، ءتىلىمىز بەن ءداستۇرىمىزدىڭ ورتاقتىعى، حالىقتارىمىزدىڭ كورشىلەستىگى قازاق پەن وزبەكتىڭ مادەني-گۋمانيتارلىق سالاداعى ءوزارا تىعىز ءىس-قيمىلىنىڭ قالىپتاسۋىنا العىشارت جاسادى. قازاقستان مەن وزبەكستاندا تۇراتىن دياسپورا وكىلدەرى قارىم-قاتىناسىمىزعا ەرەكشە سيپات دارىتىپ وتىر. ولار ەكى ەل اراسىنداعى دانەكەر بولىپ سانالادى. ءسىزدىڭ ەلمەن دوستىق پەن ىنتىماقتاستىقتى نىعايتۋعا نەگىزدەلگەن باعىتىمىز وزگەرمەيدى، – دەدى قازاقستان پرەزيدەنتى.

مەملەكەت باسشىسى استانا مەن تاشكەنت اراسىنداعى ساۋدا-ەكونوميكالىق ىنتىماقتاستىقتى ەكىجاقتى قاتىناستىڭ وزەگى دەپ باعالادى. نۇرسۇلتان نازارباەۆ 2016 جىلى نارىقتىق باعانىڭ 9%-كە تومەندەگەنىنە قاراماستان، ەلدەرىمىز اراسىنداعى ساۋدا كولەمىنىڭ 16%-كە وسكەنىنە توقتالدى.

– بۇگىندە قازاقستاندا وزبەك كاپيتالىنىڭ ۇلەسى بار 800-گە جۋىق كاسىپورىن جۇمىس ىستەيدى. ءدال قازىر استانادا بيزنەس-فورۋم وتۋدە. وعان ەكى تاراپتىڭ ارقايسىسىنان 250 بيزنەسمەن قاتىسىپ وتىر. فورۋم قورىتىندىسى بويىنشا 75 كوممەرتسيالىق شارتتان تۇراتىن قۇجاتتار جيىنتىعىن قابىلداۋ جوسپارلانعان، – دەدى قازاقستان پرەزيدەنتى.

مەملەكەت باسشىسى بۇعان دەيىن ش.ميرزيوەۆپەن سامارقاندتا وتكەن كەزدەسۋدەن سوڭ ونەركاسىپ، بيزنەس، ەنەرگەتيكا، كولىك، سونداي-اق عارىش جانە تۋريزم سالالارىنداعى ەكىجاقتى بايلانىس ايتارلىقتاي جاندانا تۇسكەنىن ايتتى.

سونىمەن قاتار، نۇرسۇلتان نازارباەۆ كولىك-ترانزيت سالاسىنداعى ىنتىماقتاستىقتىڭ جاندانا تۇسكەنىن، سونىڭ ىشىندە جۇردەك پويىزعا ارنالعان استانا – تاشكەنت تەمىرجول قاتىناسى، جاڭا اۋە جولى جانە اۆتوبۋس رەيستەرى ىسكە قوسىلعانىن ەرەكشە اتاپ ءوتتى.

سوڭىندا مەملەكەت باسشىسى «ەكسپو-2017» حالىقارالىق كورمەسىنە وزبەكستاننىڭ كەڭ اۋقىمدا قاتىسۋى جونىندە شەشىم قابىلداعانى ءۇشىن ش.ميرزيوەۆكە العىس ءبىلدىرىپ، بۇل وزبەكستان رەسپۋبليكاسىنا ءوزىنىڭ زور جەتىستىكتەرىن بۇكىل الەم الدىندا پاش ەتۋىنە مۇمكىندىك بەرەتىنىنە سەنىم ءبىلدىردى.

ش.ميرزيوەۆ مەملەكەتارالىق قارىم-قاتىناستىڭ دامۋىنا نەگىز بولعان جانە ءوزارا سەنىم مەن ىسكەرلىك سيپاتىنداعى كەلىسسوزدەر ءۇشىن قازاقستان باسشىلىعىنا العىس ءبىلدىردى.

– بۇل ساپاردى سامارقاندتا وتكەن اشىق اڭگىمەمىزدىڭ جالعاسى دەپ سانايمىز. بۇگىنگى بيزنەس-فورۋم وزبەك تاراپىنىڭ ساۋدا-ەكونوميكالىق بايلانىستارىمىزدى دامىتۋعا دەگەن شىن نيەتىن كورسەتەدى، – دەدى وزبەكستان پرەزيدەنتى.

وزبەكستان رەسپۋبليكاسىنىڭ باسشىسى ەكى مەملەكەتتىڭ حالقىنىڭ دوستىعىن نىعايتۋ ىسىندەگى نۇرسۇلتان نازارباەۆتىڭ ءرولىن اتاپ ءوتتى. سونداي-اق، ش.ميرزيوەۆ پارلامەنتارالىق جانە وڭىرارالىق بايلانىستى جانداندىرۋدىڭ ماڭىزدىلىعىنا توقتالدى.

كەزدەسۋ سوڭىندا ەكى ەلدىڭ باسشىلارى بۇقارالىق اقپارات قۇرالدارى وكىلدەرى  ۇشىن بىرلەسكەن بريفينگ وتكىزدى.

قازاقستان مەن وزبەكستان پرەزيدەنتتەرىنىڭ كەزدەسۋ قورىتىندىسى بويىنشا تومەندەگىدەي قۇجاتتارعا قول قويىلدى:

– قازاقستان رەسپۋبليكاسى مەن وزبەكستان رەسپۋبليكاسى اراسىنداعى ستراتەگيالىق ارىپتەستىكتى ودان ءارى تەرەڭدەتۋ جانە تاتۋ كورشىلىكتى نىعايتۋ تۋرالى بىرلەسكەن دەكلاراتسيا;

– قازاقستان رەسپۋبليكاسىنىڭ ۇكىمەتى مەن وزبەكستان رەسپۋبليكاسىنىڭ ۇكىمەتى اراسىنداعى وڭىرارالىق ىنتىماقتاستىق تۋرالى كەلىسىم;

– قازاقستان رەسپۋبليكاسىنىڭ ۇكىمەتى مەن وزبەكستان رەسپۋبليكاسىنىڭ ۇكىمەتى اراسىنداعى 2017-2019 جىلدارعا ارنالعان ەكونوميكالىق ىنتىماقتاستىق جونىندەگى ستراتەگيا;

– قازاقستان رەسپۋبليكاسىنىڭ ۇكiمەتi مەن وزبەكستان رەسپۋبليكاسىنىڭ ۇكiمەتi اراسىنداعى تابىس پەن مۇلiككە قوسارلانعان سالىق سالۋدى بولدىرماۋ تۋرالى كەلiسiمگە وزگەرىستەر مەن تولىقتىرۋلار ەنگىزۋ تۋرالى حاتتاما;

– 2006 جىلعى 20 ناۋرىزداعى قازاقستان رەسپۋبليكاسىنىڭ ۇكىمەتى مەن وزبەكستان رەسپۋبليكاسىنىڭ ۇكىمەتى اراسىنداعى حالىقارالىق اۆتوموبيل قاتىناسى تۋرالى كەلىسىمگە وزگەرىستەر مەن تولىقتىرۋلار ەنگىزۋ تۋرالى حاتتاما;

– قازاقستان رەسپۋبليكاسى سىرتقى ىستەر مينيسترلىگى مەن وزبەكستان رەسپۋبليكاسى سىرتقى ىستەر مينيسترلىگى اراسىنداعى 2017-2018 جىلدارعا ارنالعان ىنتىماقتاستىق جونىندەگى باعدارلاما;

– قازاقستان رەسپۋبليكاسى قورعانىس مينيسترلىگى مەن وزبەكستان رەسپۋبليكاسى قورعانىس مينيسترلىگى اراسىنداعى اسكەري ىنتىماقتاستىق تۋرالى كەلىسىم.

كەلىسسوزدەن كەيىن ەكى ەل پرەزيدەنتى استاناداعى بىرنەشە مادەني ورىنداردى بىرگە ارالاپ، ەكى ەل دوستىعى مەن باۋىرلاستىعىن ايگىلەدى. ەل باسى نۇرسۇلتان نازارباەۆ قازاق ەلى مەن وزبەك ەلى اراسىنداعى مادەني-رۋحاني ىنتىماقتاستىقتاردى ارتتىرۋعا، ەكى ەل باسشىلارىنىڭ كەزدەسۋىنىڭ ءساتتى وتۋىنە بارىنشا تىلەكشى بولاتىنىن ايتتى.

“The Qazaq Times”