Özbekstannıñ jaña prezidenti alğaşqı resmi saparın Qazaqstannan bastadı

Özbekstannıñ jañadan tağayındalğan prezidenti Şavkat Mirzieev, şeteldegi alğaşqı resmi is-saparın Qazaqstannan bastadı. Keşe, 23 naurız küni, Astanada Qazaqstan prezidenti Nwrswltan Nazarbaev pen Özbekstan prezidenti Şavkat Mirzieev eki el ükimetiniñ keñeytilgen qwramımen kelissözder jürgizdi dep habarlaydı Aqordanıñ resmi saytı.  

Kelissöz barısında taraptar kün tärtibinde twrğan özekti mäseleler jöninde pikir almastı, sonday-aq ekijaqtı ıntımaqtastıqtı damıtudıñ strategiyalıq bağıttarın talqıladı.

– Prezident retindegi Sizdiñ alğaşqı memlekettik saparıñız Naurız meyramımen jäne elderimiz arasında diplomatiyalıq qarım-qatınastıñ ornağanına 25 jıl tolğan kezeñmen twspa-tws kelip otır. Qazaqstan Özbekstan delegaciyası saparınıñ jemisti boluı üşin barlıq jağdaydı jasauğa äzir, – dedi Memleket basşısı.

Qazaqstan Prezidenti şirek ğasırlıq ıntımaqtastığımız ayasında türli saladağı 100 kelisimge qol qoyılğanın, sonıñ eñ negizgileri – Mäñgilik dostıq turalı şart pen Strategiyalıq äriptestik turalı şart ekendigin ayttı.

Nwrswltan Nazarbaev eki el arasındağı qarım-qatınastı nığaytuğa Özbekstannıñ twñğış Prezidenti I.Karimovtıñ qosqan ülesin erekşe atap ötti.

– Tarihımızdıñ, tilimiz ben dästürimizdiñ ortaqtığı, halıqtarımızdıñ körşilestigi qazaq pen özbektiñ mädeni-gumanitarlıq saladağı özara tığız is-qimılınıñ qalıptasuına alğışart jasadı. Qazaqstan men Özbekstanda twratın diaspora ökilderi qarım-qatınasımızğa erekşe sipat darıtıp otır. Olar eki el arasındağı däneker bolıp sanaladı. Sizdiñ elmen dostıq pen ıntımaqtastıqtı nığaytuğa negizdelgen bağıtımız özgermeydi, – dedi Qazaqstan Prezidenti.

Memleket basşısı Astana men Taşkent arasındağı sauda-ekonomikalıq ıntımaqtastıqtı ekijaqtı qatınastıñ özegi dep bağaladı. Nwrswltan Nazarbaev 2016 jılı narıqtıq bağanıñ 9%-ke tömendegenine qaramastan, elderimiz arasındağı sauda köleminiñ 16%-ke öskenine toqtaldı.

– Büginde Qazaqstanda özbek kapitalınıñ ülesi bar 800-ge juıq käsiporın jwmıs isteydi. Däl qazir Astanada biznes-forum ötude. Oğan eki taraptıñ ärqaysısınan 250 biznesmen qatısıp otır. Forum qorıtındısı boyınşa 75 kommerciyalıq şarttan twratın qwjattar jiıntığın qabıldau josparlanğan, – dedi Qazaqstan Prezidenti.

Memleket basşısı bwğan deyin Ş.Mirzieevpen Samarqandta ötken kezdesuden soñ önerkäsip, biznes, energetika, kölik, sonday-aq ğarış jäne turizm salalarındağı ekijaqtı baylanıs aytarlıqtay jandana tüskenin ayttı.

Sonımen qatar, Nwrswltan Nazarbaev kölik-tranzit salasındağı ıntımaqtastıqtıñ jandana tüskenin, sonıñ işinde jürdek poyızğa arnalğan Astana – Taşkent temirjol qatınası, jaña äue jolı jäne avtobus reysteri iske qosılğanın erekşe atap ötti.

Soñında Memleket basşısı «EKSPO-2017» halıqaralıq körmesine Özbekstannıñ keñ auqımda qatısuı jöninde şeşim qabıldağanı üşin Ş.Mirzieevke alğıs bildirip, bwl Özbekstan Respublikasına öziniñ zor jetistikterin bükil älem aldında paş etuine mümkindik beretinine senim bildirdi.

Ş.Mirzieev memleketaralıq qarım-qatınastıñ damuına negiz bolğan jäne özara senim men iskerlik sipatındağı kelissözder üşin Qazaqstan basşılığına alğıs bildirdi.

– Bwl sapardı Samarqandta ötken aşıq äñgimemizdiñ jalğası dep sanaymız. Bügingi biznes-forum özbek tarapınıñ sauda-ekonomikalıq baylanıstarımızdı damıtuğa degen şın nietin körsetedi, – dedi Özbekstan Prezidenti.

Özbekstan Respublikasınıñ basşısı eki memlekettiñ halqınıñ dostığın nığaytu isindegi Nwrswltan Nazarbaevtıñ rölin atap ötti. Sonday-aq, Ş.Mirzieev parlamentaralıq jäne öñiraralıq baylanıstı jandandırudıñ mañızdılığına toqtaldı.

Kezdesu soñında eki eldiñ basşıları bwqaralıq aqparat qwraldarı ökilderi  üşin birlesken brifing ötkizdi.

Qazaqstan men Özbekstan Prezidentteriniñ kezdesu qorıtındısı boyınşa tömendegidey qwjattarğa qol qoyıldı:

– Qazaqstan Respublikası men Özbekstan Respublikası arasındağı strategiyalıq äriptestikti odan äri tereñdetu jäne tatu körşilikti nığaytu turalı birlesken deklaraciya;

– Qazaqstan Respublikasınıñ Ükimeti men Özbekstan Respublikasınıñ Ükimeti arasındağı öñiraralıq ıntımaqtastıq turalı kelisim;

– Qazaqstan Respublikasınıñ Ükimeti men Özbekstan Respublikasınıñ Ükimeti arasındağı 2017-2019 jıldarğa arnalğan ekonomikalıq ıntımaqtastıq jönindegi strategiya;

– Qazaqstan Respublikasınıñ ükimeti men Özbekstan Respublikasınıñ ükimeti arasındağı Tabıs pen mülikke qosarlanğan salıq saludı boldırmau turalı kelisimge özgerister men tolıqtırular engizu turalı hattama;

– 2006 jılğı 20 naurızdağı Qazaqstan Respublikasınıñ Ükimeti men Özbekstan Respublikasınıñ Ükimeti arasındağı halıqaralıq avtomobil' qatınası turalı kelisimge özgerister men tolıqtırular engizu turalı hattama;

– Qazaqstan Respublikası Sırtqı ister ministrligi men Özbekstan Respublikası Sırtqı ister ministrligi arasındağı 2017-2018 jıldarğa arnalğan ıntımaqtastıq jönindegi bağdarlama;

– Qazaqstan Respublikası Qorğanıs ministrligi men Özbekstan Respublikası Qorğanıs ministrligi arasındağı äskeri ıntımaqtastıq turalı kelisim.

Kelissözden keyin eki el prezidenti Astanadağı birneşe mädeni orındardı birge aralap, eki el dostığı men bauırlastığın äygiledi. El bası Nwrswltan Nazarbaev qazaq eli men özbek eli arasındağı mädeni-ruhani ıntımaqtastıqtardı arttıruğa, eki el basşılarınıñ kezdesuiniñ sätti ötuine barınşa tilekşi bolatının ayttı.

“The Qazaq Times”