بۇگىن ەل استاناسىندا ءوتىپ جاتقان قازاقستان ءدىنتانۋشىلارىنىڭ ءحى فورۋمىندا ءسوز العان ۇقك تەرروريزمگە قارسى ورتالىق باستىعىنىڭ ورىنباسارى سەرگەي شۆەيكين قازاقستانداعى دەسترۋكتيۆتى اعىمدى ۇستانۋشىلاردىڭ سانى 20 مىڭنان اساتىنىن مالىمدەدى. بيىل «جۋسان 1-3» تسيكلدى ارنايى وپەراتسيالارىمەن ەلگە ءسۇريادان 516 ازامات ەلگە ورالعان.
قازاقستان ءدىنتانۋشىلارىنىڭ ءحى فورۋمى. ەلوردا. 6 قاراشا 2019 جىل. فوتو: اشىق دەرەككوز
«ءارتۇرلى الاڭدا الەمدەگى تەرروريستىك بەلسەندىلىكتىڭ ءوسىپ بارا جاتقانى بەلگىلى. جەر جاھاننىڭ تۇكپىر-تۇكپىرىندەگى لاڭكەستىكتىڭ تىيىلماي، ۇدەۋى سوعان دالەل بولا الادى. مالىمەتتەرگە سۇيەنسەك، ءححى عاسىردىڭ باسىنان بەرى الەمدە 72 مىڭنان استام تەراكت بولىپ، ودان 170 مىڭداي ادام كوز جۇمعان. كوپ جاعدايدا ولار راديكالدى، ءدىني يدەولوگيانىڭ ىقپالىمەن جاسالادى. ينتەرنەتتەگى ۇلكەن ناسيحاتتىڭ سالدارىنان ءبىزدىڭ جەكە ازاماتتار شەتەلدەگى ءارتۇرلى تەرروريستىك ۇيىمدارعا قوسىلىپ كەتەدى. راديكالدى ناسيحاتتىڭ قاقپانىنا كوزقاراسى قالىپتاسپاعان، ءدىني ءبىلىمى جوق، جاستىق ماكسيماليزمى باسىم جاستار ءتۇسىپ قالادى. ءبىزدىڭ ازاماتتاردىڭ «ءال-كايدا» قۇرامىنا كىرۋ ءۇشىن اۋعانستانعا ءبىرىنشى رەت شىعىپ كەتۋ جاعدايى 2008 جىلى تىركەلگەن ەدى. 2013 جىلى قازاقستاننان شىققانداردىڭ كوبى سيريا مەن يراكا اتتاندى. وسى كەزەڭگە دەيىن شەتەلگە 800-گە تارتا قازاقستان ازاماتى ءوتىپ كەتكەن»، – دەدى ۇكق وكىلى تەولوگتار باسقوسۋىندا.
«قازاقستاننان سيرياعا جيھاد جاساۋعا كەلدىك» دەگەن ازاماتتار. قىزىل شەڭبەر ىشىندەگى ادامنىڭ ەسىمى – ماقسات ايماحانوۆ. 2013 جىلدىڭ قازانىندا جاريالانعان ۆيدەو-ۇندەۋ. فوتو: YouTube ۆيدەوسىنان الىنعان سكرينشوت
سەرگەي شۆەيكيننىڭ سوزىنشە، سىرتتاعى شىعىپ سوعىس اۋماعىنا كەتكەن قازاقستاندىقتاردىڭ كوبى كوز جۇمعان. قالعانى ۇستالىپ، ەلگە جەتكىزىلگەن.
ءبىزدىڭ ازاماتتار نەگىزگى حالىقارالىق تەرروريستىك ۇيىمداردىڭ – دايش پەن ءال-كايدا، حايات تاحرير اش-شام قۇرامىندا دا ءجۇر. قارۋلى جيھادقا شىعىپ كەتكەن قازاقستان ازاماتتارىنىڭ باسىم كوپشىلىگى دەسترۋكتيۆتى يدەولوگيالىق اعىمدا بولعان. تاجىريبە كورسەتىپ وتىرعانداي، تەرروريستەر مەن ەكسترەميستەر ءدال سول دەسترۋكتيۆتى اعىمدى ۇستاناتىنداردىڭ قاتارىنان شىعادى. قازىرگى تاڭدا ءبىزدىڭ ەسەبىمىز بويىنشا، قازاقستاندا دەسترۋكتيۆتى يدەولوگيانى ۇستاناتىنداردىڭ سانى 20 مىڭنان ءسال اسادى. ولاردىڭ باسىم بولىگى اتىراۋ, تۇركىستان، اقتوبە، قاراعاندى وبلىستارى مەن نۇر-سۇلتان، الماتىدا قالالارىندا تۇرادى، – دەدى ۇلتتىق قاۋىپسىزدىك كوميتەتىنىڭ پولكوۆنيگى.
ۇقك تەرروريزمگە قارسى ورتالىق باستىعىنىڭ ورىنباسارى، ۇقك پولكوۆنيگى سەرگەي شۆەيكين. فوتو: اشىق دەرەككوز
بيىل قازاقستان تاراپى بىرنەشە كەزەڭنەن تۇراتىن «جۋسان» ەۆاكۋاتسيالاۋ وپەراتسياسىمەن بارلىعى 357 قازاقستاندىق بالا ەلگە جەتكىزىلگەن.
تاراتىپ ايتقاندا، 9 قاڭتاردا «جۋسان-1» قازاقستاننىڭ 47 ازاماتى, 7 جانە 9 مامىر كۇندەرى «جۋسان-2» 231 ازامات, ولاردىڭ 159-ى – بالا, ال سوڭعى «جۋسان-3» وپەراتسياسىمەن 28-31 مامىردا 67 ايەل، 171 بالا ءسۇريادان ورالعان ەدى.
بۇدان جىل بۇرىن، 2018 جىلدىڭ شىلدەسىندە قازاقستاننىڭ ۇلتتىق قاۋىپسىزدىك كوميتەتى (ۇقك) سيريا مەن يراكتا سوعىس باستالعالى تاياۋ شىعىسقا 800-گە تارتا قازاقستاندىق كەتكەنىن حابارلاعان. كوميتەت ءسۇريا مەن يراكتاعى حالىقارالىق تەررورلىق ۇيىمداردا قازاقستاننان كەتكەن 120 ەر ادام، 250-دەن استام ايەل جانە 500 بالا بارىن ايتقان.
الماتى وبل پركۋراتۋراسى. بەلسەندىلەر: «جالعان جالامەن قاماۋداعى ايگەرىم مەن دۋمانعا بوستاندىق!»
ارمان الىمبەكوۆ: مەن ول جەردىڭ رەزيدەنتسيا ەكەنىن بىلمەدىم. ەشنارسە بۇلدىرمەدىم.
قوساي ماحامباەۆ: وق تيگەن ادامدى قۇتقارام دەگەندە ءوزىمدى اتىپ تاستادى
رەزيدەنتسيا ءىسى. ورىنعازى سەرىكبول: بەيبىت شەرۋگە شىقتىم. ال، 269 باپتى مويىندامايمىن
كيبەرشابۋىلعا ۇشىراعان باق وكىلدەرى قۇقىق قورعاۋ ورگاندارىنا ارىز ءتۇسىردى