باعا نەگە قۇبىلدى: ەلەكتر قۋاتى كۇزدە ارزانداپ، جەلتوقساندا قايتا قىمباتتاماق

قىركۇيەكتىڭ سوڭىندا Energyprom رەسۋرسى قازاقستاننىڭ بىرقاتار وڭىرلەرىندە ەلەكتر ەنەرگياسى 6,5%-عا ارزانداعانىن ايتىپ سۇيىنشىلەگەن ەدى. كوپ وتپەي قاراشانىڭ 1-ءى تابيعي مونوپوليالاردى رەتتەۋ كوميتەتى جەلتوقساننان باستاپ ەلەكتر قۋاتى 6%-عا قىمباتتايتىنىن مالىمدەدى.

جازدىڭ سوڭىنا قاراي ەلدە ساعاتىنا 69,6 ملرد كۆت ەلەكتر ەنەرگياسى وندىرىلگەن. بۇل وتكەن جىلمەن سالىستىرعاندا 2,3%-عا كەم. العاشقى جارتىجىلدىقتىڭ قورىتىندىسى بويىنشا ەلەكتر ەنەرگياسىنىڭ 80,5% - جەس (جىلۋ) ەنشىسىندە، 9,7% - سەس، 8,6%-ىن گازوتۋربيندى ستانسالار وندىرگەن. ال «بولاشاق ەنەرگياسى» جاسىل ەنەرگيا تاقىرىبىندا ەكسپو وتكىزگەن ەلىمىزدە جەل ەلەكتر ستانسالارى بۇكىل ەلەكتر ەنەرگياسىنىڭ تەك 0,9% عانا بولىگىن قۇراعان. قاڭتار-شىلدە ارالىعىندا اتىراۋ، ماڭعىستاۋ، الماتى وبلىستارىندا ەلەكتر ەنەرگياسى 6,5%-عا ارزانداعان دەسەدى.

قازىرگى تاڭدا «ەلەكتر ەنەرگياسىنىڭ وزىندىك قۇنىن ەنەرگەتيكا مينيسترلىگى بەلگىلەيدى» دەگەن كوميتەت ماسەلەنى  ۆەدومستۆوعا سىرىپ وتىر. ال مينيسترلىك «باعانى كوميتەت بەلگىلەيدى» دەپ باسىن الىپ قاشۋدا. «سەن ەمەس تە مەن ەمەس» دەپ ايتىسقان ەكى تاراپ ورتاق مامىلەگە كەلمەيىنشە، «قاراشا مەن جەلتوقسان سول ءبىر ەكى ايدا»  ەكى وگىز ورتاسىندا حالىق قالتاسىنان قاعىلماي ما دەگەن الاڭداۋشىلىق بار.

بىلتىر ەكس-پرەزيدەنت نازارباەۆ تاريف تاقىرىبىن قاۋىپسىزدىك كەڭەسىندە ارنايى قاراپ، مينيسترلەردى سىنعا العان بولاتىن. ارتىنشا مونوپوليستەر نەگىزسىز تاريف ارقىلى حالىقتان العان ارتىق ميلليوندارىن كەرى قايتارا باستاعان. ەندى باعانى كوتەرۋ دەگەن ءسوز قايتا كوتەرىلە باستادى.

ءبىر ايتا كەتەرلىگى، بىلتىر قاڭتار-شىلدە ارالىعىنداعى ەلەكتر ەنەرگياسىنىڭ قۇنى 2017 جىلمەن سالىستىرعاندا 5,5%-عا قىمباتتاعان.

قىمباتشىلىق ەكى بۇيىردەن قىسقان شاقتا ەكى ورتادا ەل ەزىلمەسە يگى ەدى.

"The Qazaq Times"