وزدەرىن «يسلام مەملەكەتى» دەپ اتاعان، بۇدان 5 جىل بۇرىن يراك پەن ءسۇريا جەرىندە «حاليفات» جاريالاپ، الەم ەلدەرىن ابىگەرگە سالىپ تەررورلىق توپ ءوزىنىڭ جاڭا ليدەرىن جاريالادى. بۇدان بۇرىن اقش-تىڭ ارنايى جاساعى اتالعان تەررورلىق توپتىڭ بۇرىنعى ليدەرى ءال-باعداتيدى ارنايى وپەراتسيا بارىسىندا ولتىرگەنىن مالىمدەگەن بولاتىن.

«يم» تەررورلىق توبىنا قاتىستى اقپارات كوزدەرىندە ايتىلۋىنشا ۇيىمنىڭ جاڭا ليدەرىنىڭ ەسىمى – ابۋ يبراگيم ءال-حاشەمي ءال-كۋراشي. توپ ىشىندە حاشەمي اتىمەن كوبىرەك تانىس. بىراق، ول تۋرالى تولىق مالىمەت بەرىلمەدى، تەك ونىڭ «جيھاد» جانە «كۇرەس ارداگەرى» ەكەنىن ايتقان. بۇعان قوسا تەررورلىق توپتىڭ «رەسمي وكىلى» ء(باسپاسوز مالىمدەمەشىسى دەگەنگە ۇقساس) دە وزگەرگەن. جيھادشىل توپتىڭ مالىمدەمەلەرىن بۇدان بىلاي ابۋ حامزا ءال-كۋراشي جاساماق.

لاڭكەستىك توپتىڭ بۇنداي مالىمدەمە جاساۋى بۇرىنعى ليدەرى ءال-باعداتيدىڭ ولگەنىن راستاۋمەن بىردەي. وعان قوسا ءبىر كۇن بۇرىن پەنتاگون تارابى ءال-باعداتيدى نىساناعا العان قارۋلى وپەراتسيانىڭ ۆيدەو تاسپاسىن جاريا ەتتى. وندا تەررورشىلداردىڭ اتامانى جاسىرىنعان تۇراققا ارنايى جاساقتىڭ قالاي باسىپ كىرگەنىن جانە اۋەدەن جاسالعان سوققىلاردى انىق كورۋگە بولادى.

«يم» تەررورلىق توبىنڭ ليدەرى ءال-باعداتيدىڭ ولگەنىن مالىمدەگەن كەزدە اقش پرەزيدەنتى دونالد ترامپ «الەم بۇرىنعىدان الدە قايدا قاۋىپسىز بولا ءتۇستى»، – دەگەن بولاتىن. ترامپتىڭ بۇل ءسوزىن تەرىستەگەندەي «يم» توبى ءوزىنىڭ جاڭا ليدەرىن جاريا ەتىپ، ءالى دە بەلسەندى كۇيدە ەكەنىن اڭعارتقانداي بولدى. الەم اقپارات قۇرالدارىندا اتالعان جيھادشىل توپتىڭ قازىرگى جاعدايى تۋرالى تولىق ءارى ناقتى دەرەكتەر تىم از. بىراق، بىرقاتار شەتەلدىك اقپارات قۇرالدارى «يم» توبى تولىعىمەن جويىلماعانىن، ونىڭ جاقتاستارى الداعى ۋاقىتتا وزگە ەلدەردە ارەكەت ەتۋى مۇمكىن ەكەنىن ەسكەرتىپ كەلەدى.

 

“The Qazaq Times”