اقش سوزىندە تۇرماي، كۇردتەر باسقا ايماققا كەتپەيتىن بولسا، تۇركيا سۇرياداعى اسكەري وپەراتسيانى جالعاستىرادى. بۇعان جاۋاپ رەتىندە ۋاشينگتون انكاراعا اسكەري سوققى جاساۋى مۇمكىن، – دەيدى NBS تەلەكومپانياسى.

9 قازاندا تۇركيا ءسۇريانىڭ سولتۇستىگىندە «بەيبىتشىلىك قاينارى» اتالاتىن ارنايى وپەراتسيا باستاعان. تۇرىك اۆياتسياسى مەن ارتيللەرياسى كورشى ەل اۋماعىنداعى كۇرد جاساقتارىن سوققىعا الدى. اسكەري وپەراتسيانىڭ ماقساتى – لاڭكەستەرگە وڭتۇستىك شەكارادا ءدالىز قۇرۋعا جول بەرمەۋ. تۇركيانىڭ بۇل قادامىنان كەيىن الەم ەلدەرى مەن حالىقارالىق ۇيىمدار ءارتۇرلى پىكىر بىلدىرە باستادى. وسى رەتتە ەۋروپالىق وداق وكىلدەرىنىڭ ايتۋىنشا، سۇرياداعى شيەلەنىسكە قاتىستى كەز كەلگەن ماسەلە بۇۇ قاۋىپسىزدىك كەڭەسىنىڭ 2254 رەزوليۋتسياسى مەن 2012 جىلى قابىلدانعان جەنەۆا كومميۋنيكەسىنە سايكەس شەشىلۋ كەرەك.

قازىرگى ۋاقىتتا  اقش تاراپى ءسۇريانىڭ سولتۇسىگىنەن اسكەريلەرىن شىعارىپ، يراككا جىبەرىپ جاتىر. ەل-كامىشلى ەلدى مەكەنىنەن كەشە جۇزگە جۋىق تەحنيكا داحۋكقا كوشىرىلگەن. بۇل جونىندەمالىمدەمە جاساعان اق ءۇي باسشىسى ترامپ: «تۇركيا مەن كۇرد جاساقتارى ويىن الاڭىندا ويناپ جۇرگەن ەكى بالاعا ۇقسايدى. باقىلاماساڭ، توبەلەسىپ قالادى. اراسىنا ءتۇسىپ اراشالاۋ كەرەك. سول اجىراتاتىن ەرەسەك اقش بولىپ تۇرعوي مۇندا. مەنىڭ ويىمشا، ەكى تاراپقا ەڭ ىڭعايلىسى – كەلىسىمگە كەلۋ. امەريكالىق اسكەريلەردى ءسۇريادان سول ءۇشىن اكەتىپ جاتىرمىز»، – دەيدى.

22 قازاندا تۇركيا پرەزيدەنتى مەن رەسەي باسشىسى سوچيدە كەزدەسۋ وتكىزىپ، اسكەري وپەراتسيانى تالقىلاعان. ساراپشىلاردىڭ بولجاۋىنشا، ەردوعان اقش-قا توتەپ بەرۋ ءۇشىن وداقتاس ىزدەمەك. كەيىننەن رەجەپ تايىپ ەردوعان: «بۇگىن سوڭعى كۇن. ساعات 22.00-دە ۋاقىتشا كەلىسىم اياقتالادى. ءبىزدىڭ اسكەريلەر بارلىعىن باقىلاۋدا ۇستاپ وتىر. امەريكا بەرگەن ۋادەسىن ورىنداماسا، كۇردتەر وڭىردەن كەتپەسە، تۇركيا اسكەري وپەراتسيانى توقتاعان جەرىنەن قايتا جالعاستىرادى»، – دەدى.

"The Qazaq Times"