توقاەۆتىڭ اسانوۆتى ءۇشىنشى رەت قابىلداۋى: سوتتان بولەك تاتۋلاسۋ ورتالىقتارى قۇرىلماق

مەملەكەت باسشىسى جوعارعى سوت توراعاسى جاقىپ اسانوۆتى بيىلدىققا ءۇشىنشى رەت جەكە قابىلدادى.

اقوردا تاراتقان اقپارات بويىنشا، جاقىپ اسانوۆ ەل پرەزيدەنتىنە بيىلعى 9 اي ىشىندەگى جوعارعى سوت قىزمەتىنىڭ قورىتىندىلارى مەن سوت جۇيەسىن جەتىلدىرۋ بويىنشا جۇرگىزىلگەن جۇمىستار جونىندە مالىمەت بەرگەن.

سوت توراعاسى توقاەۆقا سۋديالاردى ىرىكتەۋ جۇيەسىن جاقسارتۋ، بىرىڭعاي سوت تاجىريبەسىن قامتاماسىز ەتۋ، سوت تورەلىگىن جاڭعىرتۋ، سونىڭ ىشىندە سوتتان تىس تاتۋلاسۋ ورتالىقتارىن قۇرۋ، وتباسى سوتتارى مەن فرونت-وفيستەر جايىندا اتقارىلعان شارالار تۋرالى بايانداعان كورىنەدى.

مەملەكەت باسشىسى حالىقتىڭ سوت جۇمىسىنا دەگەن سەنىمىن ارتتىرۋ، ازاماتتاردىڭ ءوتىنىش-شاعىمدارىن ءادىل قاراۋ، شىعارىلاتىن سوت شەشىمدەرىنىڭ ساپاسىن جاقسارتۋ قاجەتتىگىن ايتقان.

پرەزيدەنت سۋديالاردىڭ جۇكتەمەسىن ازايتۋ جانە سوت شەشىمدەرىنىڭ ساپاسىنا كەرى اسەر ەتەتىن ولارعا قاتىسى جوق ىستەردەن بوساتۋ جونىندە شارالار قابىلداۋدى تاپسىرىپ، سونداي-اق، سۋديالار كورپۋسىنىڭ قۇزىرەتتىلىگىن ارتتىرۋ جۇمىستارىن جالعاستىرۋدىڭ ماڭىزدىلىعىنا نازار اۋدارعان.

وسىعان دەيىن ماۋسىمنىڭ 24-ءى توقاەۆتىڭ قابىلداۋىندا بولعان اسانوۆ "سوتتاردىڭ قىزمەتىن جەتىلدىرۋگە جانە سۋديالاردىڭ جۇمىسىنا حالىقتىڭ سەنىمىن ارتتىرۋعا باعىتتالعان 16 زاڭ جوباسى ازىرلەنگەنى تۋرالى" بايانداعانى ەسىمىزدە. ول كەزدە سوت توراعاسى سۋديالاردىڭ كاسىبيلىگىن كۇشەيتەتىنىن، ءارى الداعى 2,5 جىلدىڭ ىشىندە سوت جۇيەسىن لايىق ەمەس كادرلاردان تولىق تازارتۋعا ۋادە بەرگەن. ال 12 شىلدەدە وتكەن ەكىنشى كەزدەسۋدە  اسانوۆ العاشقى جارتىجىلدىقتىڭ قورىتىندىلارىمەن ءبولىسىپ،  سوت جۇيەسىن جەتىلدىرۋ بارىسى جونىندە ءسوز ەتكەن بولاتىن. ول پروتسەسسۋالدىق كودەكستى ودان ءارى جاڭعىرتۋعا باعىتتالعان زاڭ جوبالارىنىڭ دايىندىعى جانە جاڭا اكىمشىلىك ادىلەت ينستيتۋتىن ەنگىزۋ جونىندە بايانداعان.

توقاەۆ سوت شەشىمدەرىنىڭ ساپاسىن ارتتىرۋ جانە ازاماتتاردىڭ وتىنىشتەرىن مۇقيات ءارى ءادىل قاراۋ قاجەتتىگىن ەسكەرتكەن تۇستا  ماۋسىم-شىلدە ايلارىندا قازاقستانداعى «ادىلەتسىز سوت جۇيەسىنە» قارسى بىرنەشە نارازىلىقتار وتكەن بولاتىن. «جوعارعى سوت توراعاسى جاقىپ اسانوۆتىڭ وتستاۆكاعا كەتۋىن» تالاپ ەتكەن نارازىلار ءوز ماسەلەلەرىن شەشەتىن ارنايى كوميسسيا قۇرۋدى سۇراعان ەدى. ەلدەگى ازاماتتىق قوعام تاراپىنان سوت جۇيەسىنىڭ ادىلدىگىنە سەنبەيتىن، مەحانيزم جۇمىسىنا كوڭىلى تولمايتىن كوڭىل-كۇي جىلدار بويى كۇشەيىپ كەلەدى. وتكەن اپتادا جاڭاوزەندىك سۋديا ايزادا سەيلحانوۆا دا پارا العانى ءۇشىن اقتاۋ قالالىق سوتىنىڭ ۇكىمىمەن 3 جىل مەرزىمگە باس بوستاندىعىنان ايىرىلدى.

ەلورداداعى "نۇر وتان" پارتياسىنىڭ عيماراتىنا جينالعان نارازى جۇرت. 4 ماۋسىم 2019 جىل. فوتو: ازاتتىق / ءسانيا تويكەن

"The Qazaq Times"