ەۋروپالىق وداق سامميتىندە Brexit جوسپارى تالقىلانىپ، 1 قاراشادا ۇلىبريتانيا وداق قۇرامىنان شىعاتىنى ءمالىم بولدى. مۇنىمەن قاتار، ەۋرووداقتىڭ Brexit بويىنشا كەلىسسوز جۇرگىزۋشىسى ميشەل بارنە يرلانديا مەن سولتۇستىك يرلاندياعا قاتىستى 25 بەتتەن تۇراتىن ساياسي دەكلاراتسيانىڭ قابىلدانعانىن ايتتى.

ەۋروپالىق كەڭەس توراعاسى دونالد تۋسك: «ءبىزدىڭ تاراپ بۇل كەلىسىمدى قولداپ وتىر. جوسپارلانعان مارەگە از عانا ۋاقىت قالدى. جاڭا كەلىسىمدەردى يرلانديا دا جاقسى باعالادى. وداق ارقاشان يرلانديانى قولدايدى جانە دۋبلين ءۇشىن ءتيىمسىز كەلىسىمدەردى ۇسىنبايمىز»، – دەدى. ەۋروپالىق وداق مۇشەلەرىنىڭ بايانداماسىنان كەيىن ءسوز سويلەگەن بوريس دجونسون: «ۇلىبريتانياداعى ارىپتەستەرىم بۇل قۇجاتتى ءبىراۋىزدان قولدايدى دەپ ويلايمىن. بريتان حالقىنىڭ مۇددەسى ءۇشىن، ەشقانداي كەدەرگىسىز وداقتان شىقساق بولادى. بۇل دەنساۋلىق ساقتاۋ مەن ينۆەستيتسيا سالاسى جاقسارىپ، 20 مىڭ پوليتسيا قىزمەتكەرلەرىنىڭ جالاقىسى كوتەرىلەدى دەگەن ءسوز»، – دەپ مالىمدەدى.

سونىمەن، ەو سامميتىندە 27 ەلدىڭ كوشباسشىسى قولداعان بۇل كەلىسىم ەندى بريتاندىق پارلامەنتتە ۇسىنىلادى. ءۇش رەت قابىلدانباعان Brexit بۇل جولى ەش كەدەرگىسىز 31 قازانعا دەيىن بەكىتىلۋى ءتيىس. تاراپتار كەزەكتى مارتە ورتاق كەلىسىمگە كەلە الماسا، بىرىككەن كورولدىك وداقتان كەلىسىمسىز كەتەدى.

وسىعان دەيىن سولتۇستىك يرلانديانىڭ ەو-عا قاراستى بىرىڭعاي كەدەندىك ايماعىندا قالۋى دجونسون ۇسىنعان Brexit بويىنشا جاڭا جوسپارعا تولىعىمەن قايشى كەلەتىنى ايتىلعان بولاتىن. بريتاندىق پرەمەردىڭ ۇسىنىسى «بەكستوپ» رەجيمىنە بالاما سانالادى. ياعني اتالعان جوسپار ەو مەن بۇرىنعى پرەمەر-مينيستر تەرەزا مەي ۇكىمەتى اراسىندا قول جەتكىزىلگەن كەلىسىمنىڭ بولىگى سانالادى.

بىرككەن كورولدىكتىڭ پرەمەرى بوريس دجونسوننىڭ ۇسىنىسىنا سايكەس، سولتۇستىك يرلانديا وتپەلى كەزەڭ وتكەننەن كەيىن كەدەن وداعى قۇرامىنان ءبىرجولاتا شىعادى جانە وسى اۋماقتاعى تاۋارلاردىڭ بارلىق ساناتىنا جاڭادان كەدەندىك رەجيم ەنگىزىلەتىن بولادى.

"The Qazaq Times"