فوتو: http://s5.bloknot

سۇرياداعى جاعدايدى اسكەري ەمەس، ساياسي جولمەن شەشۋ قاجەت، – دەيدى ليۋكسەمبۋرگتە وتكەن جيىندا ەۋروپالىق ديپلوماتيا باسشىسى فەدەريكا موگەريني.

تۇركيانىڭ سۇرياداعى اسكەري وپەراتسياسى ەو قاۋىپسىزدىگىنە نۇقسان كەلتىرەتىنىن ايتقان فەدەريكا موگەريني: «اسكەري وپەراتسيا سالدارىنان «يراك جانە لەۆانت لاڭكەستىك ۇيىمى» ارەكەتى قايتا جاندانۋى مۇمكىن. مۇنداي جاعداي ەۋرووداق قاۋىپسىزدىگىنە تىكەلەي قاۋىپ توندىرەتىنى ءسوزسىز. سونداي-اق ول وڭىرلىك جانە حالىقارالىق قاۋىپسىزدىك ءۇشىن دە اسا قاتەرلى. جالپى ەۋروپالىق وداق سۇرياداعى اسكەري ءىس-قيمىلدارعا ەشقاشان قاتىسقان ەمەس. سەبەبى، بۇل وڭىرگە ونسىزدا كوپتەگەن ارميا جۇمىلدىرىلعان. بىراق قاقتىعىس اسكەري ءىس-قيمىلمەن ەمەس، ساياسي جولمەن شەشىلۋى قاجەت. تۇركيا اتالعان ايماقتا وپەراتسيا جۇرگىزە باستاعالى بەرى ماسەلە ودان سايىن كۇردەلەنىپ كەتتى. سوندىقتان وسى ءبىر تۇيتكىلدى جاھاندىق دەڭگەيدە تالقىعا سالىپ، وعان نۇكتە قويۋ جاعىن قاراستىرۋ قاجەت»، – دەيدى.

ەۋروپالىق وداق كەڭەسىنىڭ قورىتىندى مالىمدەمەسىندە وداقتىڭ ءسۇريا ەگەمەندىگىنە ءارى بىرلىگى مەن اۋماقتىق تۇتاستىعىنا نۇقسان كەلتىرىلمەۋى قاجەتتىگى ايتىلعان. سونىمەن قاتار، سۇرياداعى شيەلەنىسكە قاتىستى كەز كەلگەن ماسەلە بۇۇ قاۋىپسىزدىك كەڭەسىنىڭ 2254 رەزوليۋتسياسى مەن 2012 جىلى قابىلدانعان جەنەۆا كومميۋنيكەسىنە سايكەس شەشىلۋ كەرەك.

ەسكە سالا كەتەيىك، 9 قازاندا تۇركيا ءسۇريانىڭ سولتۇستىگىندە «بەيبىتشىلىك قاينارى» اتالاتىن ارنايى وپەراتسيا باستاعان. تۇرىك اۆياتسياسى مەن ارتيللەرياسى كورشى ەل اۋماعىنداعى كۇرد جاساقتارىن سوققىعا الدى. اسكەري وپەراتسيانىڭ ماقساتى – لاڭكەستەرگە وڭتۇستىك شەكارادا ءدالىز قۇرۋعا جول بەرمەۋ.

"The Qazaq Times"