بەيجىڭ شەشىمىنە قارسى گونكونگ تۇرعىندارى اقش-تان كومەك سۇراپ وتىر

گونكونگتە بەيجىڭ شەشىمىنە قارسى ەرەۋىلدەر جالعاسىن تاپتى. The Washington Post باسىلىمىنىڭ مالىمەتىنشە، وسى اپتادا شەرۋگە شىققان ون مىڭداي نارازى جۇرت اقش-تان كومەك سۇراپ وتىر.

گونكونگ تۇرعىندارى قىتايدىڭ «ءبىر مەملەكەت، ەكى جۇيە» ۇستانىمىنا قارسى شىعىپ وتىر. بارلىق ايىپتاۋلاردى ورىنسىز دەپ تانىعان بەيجىڭ تارابى «اقش پەن باتىس ەلدەرى شاھارعا ىرىتكى سالدى» دەيدى. وسى رەتتە ۇكىمەت عيماراتىنىڭ ماڭىنا جينالعاندار گونكونگتەگى ازاماتتاردىڭ قۇقىعى تۋرالى زاڭ جوباسىن قابىلداۋ جونىندە ۋاشينگتونعا ۇندەۋ تاستادى. ۇندەۋدە امەريكالىق كونگرەسس قالانىڭ دەموكراتياسىنا قارسى شىققان قىتايلىق جانە گونكونگتىك شەنەۋنىكتەردى جازالاۋى كەرەكتىگى ايتىلعان. امەريكا تۋىن قولدارىنا ۇستاعان جاستار «بىزگە دەموكراتيا كەرەك!» دەپ ۇرانداتتى.

گونكونگتەگى جاپپاي نارازىلىق شەرۋلەرى  ماۋسىمدا باستالعان. 16 ماۋسىمدا 2 ميلليونعا جۋىق ادام نارازىلىق شەرۋىنە شىققان ەدى. بۇل ەل تاريحىندا بولماعان ماسسالىق نارازىلىق اكتسياسى. اراعا ون كۇن سالىپ ەكستراديتسيالاۋ تۋرالى زاڭعا تۇزەتۋلەر ەنگىزۋگە قارسى جۇزدەگەن دەمونسترانت تاعى دا شەرۋگە شىقتى. ولار جاپونيانىڭ وساكا قالاسىندا وتەتىن G20 سامميتىنە قاتىساتىن 19 ەلدىڭ كونسۋلدىق كەڭسەلەرىنە بارىپ، باسشىلارىنان قىتايعا قارسى قىسىم كورسەتۋدى تالاپ ەتتى.نارازى توپ ەل ازاماتتارىنىڭ قىتايعا ەكستراديتسيالاۋ تۋرالى زاڭعا نارازىلىق تانىتقان. الايدا، قىتاي ۇكىمەتى بۇل نارازىلىق اكتسياسىن «شەتەلدىك كۇشتەر ۇيىمداستىردى»، «ولار قىتايعا زيان كەلتىرۋگە تىرىسۋدا» دەپ مالىمدەدى.

مۇنداي اسا اۋقىمدى نارازىلىق شەرۋى گونكونگتە 1997 جىلدان بەرى بولعان ەمەس. سول تۇستا بريتانيا ۇكىمەتى گونكونگتى قىتاي ۇكىمەتىنىڭ ايرىقشا باسقارۋ تارتىبىنە وتكەرىپ بەرگەن بولاتىن. بۇعان نارازى ءجۇز مىڭداعان ادام كوشەگە شىعىپ، قحر بيلىگىن قابىلداۋعا قارسى نارازىلىق بىلدىرگەن. گونكونگتا جەرگىلىكتى اكىمشىلىك باسشىسى كەرري لام زاڭ جوباسىن كۇن تارتىبىنەن الىپ تاستاۋ تۋرالى شەشىم قابىلدادى، بىراق بۇل ۇكىمەتكە قارسى نارازىلىق تولقىنىن توقتاتپادى.

"The Qazaq Times"