ۇلىبريتانيا مەن ەۋرووداق اراسىنداعى Brexit كەلىسىمى جونىندەگى كەلىسسوزدەر تىعىرىققا تىرەلدى. بۇل تۋرالى ەۋروپا پارلامەنتىنىڭ پرەزيدەنتى داۆيد ساسسولي مالىمدەدى.

داۆيد ساسسولي: «ەۋرووداقتى قاناعاتتاندىرارلىق، ياعني بەلفاست كەلىسىمى مەن يرلانديا ارالىنداعى شەكارا ماسەلەسىنە نۇقسان كەلتىرمەيتىن كەلىسىم جاسالمايىنشا، ەۋروپارلامەنت بۇل ماسەلەدە ەشبىر باتۋاعا كەلمەيدى. جالپى Brexit-ءتىڭ ءبىتۋىنىڭ ەكى جولى بار. ءبىرىنشىسى، Brexit مەرزىمىن كەيىنگە شەگەرۋ بولسا، ەندى ءبىرى وداقتان كەلىسىمسىز شىعۋ. ەگەر سالماقتى سەبەپ بولسا، ەۋروپارلامەنت وداقتان شىعۋ مەرزىمىن سوزۋعا دايىن»، – دەدى. سونىمەن قاتار، ەۋروپالىق وداق بىرىككەن كورولدىكسىز ەكونوميكالىق جوسپارلار دايىنداۋدى قولعا العان.

قازىر ۇلىبريتانيا بەلسەندى تۇردە وداققا مۇشە ەلدەرمەن جەكە كەلىسسوزدەر جۇرگىزىپ جاتىر. دەگەنمەن، لوندون دا، بريۋسسەل دە ۇلىبريتانيانىڭ ەۋرووداق قۇرامىنان شىعۋ شارتى تۋرالى ورتاق كەلىسىمگە كەلگەن جوق. سەبەبى بريتان پرەمەرى بوريس دجونسوننىڭ ۇسىنىستارى ەۋروپارلامەنتتە قولداۋ تاپقان جوق.

ۇلىبريتانيا ەو-دان بيىل 29 ناۋرىزدا، ياعني قاۋىمداستىقتان شىعۋ تۋرالى جازباشا حابارلاما بەرىلگەننەن كەيىن ەكى جىل وتكەن سوڭ كەتۋى كەرەك ەدى. الايدا بريتان پارلامەنتى قاۋىمدار پالاتاسىنىڭ دەپۋتاتتارى بريۋسسەل مەن بۇرىنعى پرەمەر-مينيستر تەرەزا مەي ۇكىمەتى اراسىندا قول جەتكىزىلگەن Brexit شارتتارى تۋرالى كەلىسىمنىڭ جوباسىن ءۇش رەت كەرى قايتارعان. ناتيجەسىندە ەۋروپالىق وداق Brexit-ءتى الدىمەن ءساۋىر نەمەسە مامىرعا، سودان كەيىن 31 قازانعا بەكىتۋگە كەلىستى. ساناۋلى جدىلدار ىشىندە بىرنەشە قيىندىققا تاپ بولعان مەي ۇكىمەتتى تىعىرىقتان شىعارا الماي، وتستاۆكاعا كەتۋگە ءماجبۇر بولدى.

مەيدىڭ ورنىنا كەلگەن بوريس دجونسون ۇلىبريتانيانىڭ Brexit كەلىسىمىن 31 قازانعا بەكىتتى. دەگەنمەن، وپپوزيتسيالىق پارتيالار مەن باسقارۋشى كونسەرۆاتيۆتى پارتيا دەپۋتاتتارىنىڭ قولداۋىمەن Brexit-ءتى ءۇش ايعا كەيىنگە قالدىرۋدى تالاپ ەتەتىن جانە كەلىسىمسىز شىعۋعا تىيىم سالاتىن زاڭ قابىلداندى.

"The Qazaq Times"