اقش پرەزيدەنتى دونالد ترامپ جانە تۇركيا باشىسى رەجەپ تايىپ ەردوعان. فوتو: https://cdn.sm

تۇركيا پرەزيدەنتى رەجەپ تايىپ ەردوعان 1998 جىلى ادانا قالاسىندا انكارا مەن داماسك اراسىندا قول قويىلعان كەلىسىمگە ساي تۇرىك اسكەرلەرى ءسۇريادا ترانسشەكارالىق وپەراتسيا جۇرگىزۋگە قۇقىلى دەپ مالىمدەدى.

Yeni Safak گازەتىنە سۇحبات بەرگەن ەردوعان اقش پرەزيدەنتى دونالد ترامپقا قاراتا: «سۇرياداعى اۋە كەڭىستىگىن پايدالانۋعا كەلەر بولساق، ول اقش-قا تيەسىلى ەمەس. بۇل حالىقارالىق كەڭىستىك ياعني ءسۇريانىڭ اۋە كەڭىستىگى. ول اقش-قا تيەسىلى ەمەس. ونى پايدالانۋ تۋرالى ماسەلە ء[سۇريا پرەزيدەنتى باشار اساد] تارتىبىمەن شەشىلەدى. امەريكا ءسۇريادا ارنايى كەلىسىلگەن رەجيمگە ساي قادام جاساپ وتىرعان جوق. ال ءبىز ءسۇريا اۋماعىندا اداناداعى كەلىسىم اياسىندا ءىس-قيمىل باستادىق. وسى شارتقا سايكەس ءبىزدىڭ اسكەريلەرىمىز  لاڭكەستەردى قۋدالاۋعا قۇقىلى»، – دەدى.

تۇركيا مەن ءسۇريا اراسىنداعى قارىم-قاتىناس 1980-1990 جىلدارى شيەلەنىسە باستاعان. ويتكەنى، انكارا داماسكتى كۇردستاننىڭ جۇمىس پارتياسىن (رپك) قولدادى دەپ ايىپتادى. 1998 جىلدىڭ قازانىندا ەكى ەل قارىم-قاتىناسى ساياسي داعدارىسقا ۇشىراپ، وسى ماسەلەنى شەشۋ ءۇشىن تۇركيا سۇرياعا 45 كۇندىك مەرزىم بەردى. سول جىلى سۇريالىق بيلىك رپك كوشباسشىسى ابدۋللاح ودجالاندى ەلدەن قۋ تۋرالى شەشىمگە كەلگەن. كەيىننەن 1998 جىلى 20 قازاندا تۇركيا مەن ءسۇريانىڭ سىرتقى ىستەر مينيسترلىگى، ىشكى ىستەر باسقارماسىنىڭ وكىلدەرى  ادانادا قاۋىپسىزدىك ماسەلەلەرى جونىندەگى بىرلەسكەن حاتتاما مەن كەلىسىمگە قول قويعان.

كەشە اق ءۇي باسشىسى ترامپ مالىمدەمەسىندە تۇركياعا ەسكەرتۋ جاساپ، «شەكتەن شىعىپ كەتسە ەلدىڭ ەكونوميكاسىن تالقاندايمىن» دەپ ەسكەرتەكەن. وسى رەتتە تۇرىك باسىلىمدارىنا ەردوعان العاش رەت امەريكالىق ارىپتەسىنىڭ مالىمدەمەسىنە قاتىستى تۇسىنىكتەمە بەردى. ءوز سوزىندە ول: «مەن ترامپتىڭ بۇل پىكىرىن قازىرگى جاعدايدى ودان ارى ۋشىقتىرۋ دەپ بىلەمىن. دەگەنمەن، بىزدە قازىر مۇمكىندىك بار. ترامپپەن ەكىجاقتى بايلانىستاردى قولدايمىز جانە ونى ءارى قاراي جالعاستىرامىز. بىرلەسە وتىرىپ تۇركيا – امەريكا قارىم-قاتىناسىن نىعايتۋعا تىرىسامىز»، – دەدى. سونىمەن قاتار، تۇرىك باسشىسى 13 قاراشادا ۋاشينگتوندا اقش پرەزيدەنتىمەن كەلىسسوزدەر جۇرگىزۋدى جوسپارلاپ وتىر.

وتكەن اپتادا ەردوعان ەفرات وزەنىنەن شىعىسقا قاراي كۇرد لاڭكەستەرىنە قارسى وپەراتسيا جۇرگىزىلەتىنىن حابارلاعان بولاتىن. ءدال بۇگىن تۇركيانىڭ قارۋلى كۇشتەرى ءسۇريادا اسكەري وپەراتسيانى باستاپ كەتتى. تۇرىك اۆياتسياسى مەن ارتيللەرياسى كورشى ەل اۋماعىنداعى كۇرد جاساقتارىن سوققىعا الدى. اسكەري وپەراتسيانىڭ ماقساتى – لاڭكەستەرگە وڭتۇستىك شەكارادا ءدالىز قۇرۋعا جول بەرمەۋ. تۇركيا پرەزيدەنتى رەجەپ تايىپ ەردوعاننىڭ مالىمدەۋىنشە، سونىڭ ناتيجەسىندە ەكى ەل شەكاراسىندا قاۋىپسىز ايماق قۇرىلادى. جانە بۇعان دەيىن تۇركيانى پانالاعان سيريالىق بوسقىندار ءوز ۇيلەرىنە ورالاتىن بولادى. رەسمي انكارا بۇل ارقىلى شەكارالاس وڭىردە قاۋىپسىزدىك ايماعىن قۇرىپ، وندا سيريالىق بوسقىنداردى ورنالاستىرۋدى كوزدەپ وتىر.

"The Qazaq Times"