قازاقستان پرەزيدەنتى قاسىم-جومارت توقاەۆ نۇر-سۇلتان قالاسىنىڭ قۇرىلىسىن سىنعا الىپ، كوشەلەرى مەن عيماراتتارىنىڭ بىرىڭعاي ديزين-كودىن راسىمدەۋدى تاپسىردى.

بۇل جونىندە پرەزيدەنت: «قالادا بىرىڭعاي قالاقۇرىلىسى ساياساتى جوق. بۇل كەيبىر اۋدانداردا بەيبەرەكەت قۇرىلىستاردىڭ جۇرگىزىلۋىنە اكەپ سوعادى. كوشەلەر مەن عيماراتتاردىڭ بىرىڭعاي گارمونيالىق ءستيلى جوق. سىزدەر ەلوردانى كورۋگە ارنايى كەلگەن تۋريستەردىڭ پىكىرىن وقىعان بولارسىزدار. جالپى پىكىرلەر جاقسى، بىراق ولار قالادا ەكلەكتيكا بارىن ايتادى. ءبىر عيمارات ءبىر ستيلدە، ەكىنشىسى مۇلدە باسقا. ەڭ باستىسى – جايلىلىق جوق. پليتالار ۇشىپ، اسفالت جارىلىپ جاتىر، اعاشتار از، سونىڭ سالدارىنان قالانى كۇتىپ باقپايتىنى كورىنەدى. يەسى جوق الىستان ءزاۋلىم عيمارات ادەمى كورىنەدى، جاقىنداپ كەلسەڭ شارشاعانىن بايقاۋعا بولادى. قوجايىن كەرەك. قوجايىن رەتىندە نەگىزى اۋدان اكىمدەرى بولۋى كەرەك. ولار كەڭسەسىندە وتىرا بەرمەي جاياۋ ءجۇرىپ، تۇرعىندارىن ءبىلۋى كەرەك، عيماراتتاردىڭ، ادامداردىڭ ءومىرىن ءبىلۋى كەرەك»، – دەدى.

سونىمەن قاتار، مەملەكەت باسشىسى: «قالانىڭ قاندايدا ءبىر شارۋاشىلىق يەسى بارى بايقالمايدى. ارينە، اۋا-رايىندا ەسكەرۋ كەرەك. سولتۇستىك ەۋروپادا ورنالاسقان قالالار دا بار ەمەس پە؟ سول سەبەپتى كەش بولماي تۇرىپ نۇر-سۇلتان قالاسىنىڭ كوشەلەرى مەن عيماراتتارىنىڭ بىرىڭعاي ديزين-كودىن راسىمدەۋدى تاپسىرامىن. بۇل مەنىڭ اكىمدىككە دەگەن قاتاڭ تاپسىرما»، – دەدى.

"The Qazaq Times"