تۇركيا ءسۇريانىڭ سولتۇستىگىن كۇرد جاساقتارىنان تازالاۋ ماقساتىندا ەكى ەل شەكاراسى ماڭىنا قوسىمشا اسكەر جىبەردى.

وسى اپتادا تۇركيا پرەزيدەنتى رەجەپ تايىپ ەردوعان ەفرات وزەنىنەن شىعىسقا قاراي كۇرد لاڭكەستەرىنە قارسى وپەراتسيا جۇرگىزىلەتىنىن حابارلاعان بولاتىن. انكارا بۇل ارقىلى شەكارالاس وڭىردە قاۋىپسىزدىك ايماعىن قۇرىپ، وندا سيريالىق بوسقىنداردى ورنالاستىرۋدى كوزدەپ وتىر. دەگەنمەن، اسكەري ءىس-قيمىل ءىرى سوعىسقا ۇلاسۋ قاۋىپى بار. سەبەبى كۇردتەر دە تۇرىكتەردىڭ شابۋىلىنا تويتارىس بەرۋگە دايىن ەكەنىن ەسكەرتتى.

قازىرگى ۋاقىتتا ەكى ەل شەكاراسىنداعى جاعداي ۋشىعىپ تۇر. 6 قىركۇيەكتە تۇرىك پرەزيدەنتى رەجەپ تايىپ ەردوعان ءسۇريانىڭ سولتۇستىگىندە قاۋىپسىزدىك ايماعىن قالىپتاستىرۋ ءۇشىن تۇركياعا حالىقارالىق قولداۋ كورسەتىلمەسە، ميلليونداعان بوسقىندار ءۇشىن ەۋروپاعا شەكارا ايقارا اشىلاتىنىن ەسكەرتكەن بولاتىن. سونىمەن قاتار، رەسمي انكارا ەۋروپا ەلدەرىنەن لوگيستيكالىق كومەك سۇراعان. وسىعان بايلانىستى، بوسقىندار مەن بەيبىت تۇرعىنداردىڭ سۇرياداعى قاۋىپسىزدىگىن قامتاماسىز ەتۋگە قولداۋ كورسەتەتىن بىردەن-ءبىر مەملەكەت اقش بولعاندىقتان، تۇركيا اتالعان ماسەلەنى امەريكالىق اسكەرلەرمەن بىرلەسە شەشۋگە بەل بۋعان.

9 قىركۇيەكتە تۇركيا مەن اقش اسكەرلەرى ءسۇريانىڭ ەۆفرات وزەنىنەن شىعىس اۋدانداردا قاۋىپسىزدىك ايماعىن قۇرۋ ماقساتىندا بىرلەسكەن وپەراتسيا وتكىزگەن. كەيىننەن رەسمي انكارا ۋاشينگتوننىڭ بۇل ىستە نەمقۇرايدىلىق تانىتىپ وتىرعانىن حابارلاعان.

"The Qazaq Times"