رەسپۋبليكالىق بيۋدجەت جوباسىنداعى شىعىن قانشا؟

ەلوردادا وتكەن ۇكىمەت وتىرىسىندا 2019 جىلعا ارنالعان بيۋدجەت جوباسى ناقتىلاندى.

مالىمەتتەر بويىنشا، بيىل ناۋرىزدا تۇزەتىلگەن الەۋمەتتىك-ەكونوميكالىق دامۋ بولجامىنىڭ نەگىزگى كورسەتكىشتەرىنىڭ ساقتالۋىن ەسكەرە وتىرىپ، 2019 جىلعا ارنالعان رەسپۋبليكالىق بيۋدجەتكە ناقتىلانعان كىرىستەر 7081,3 ملرد تەڭگەنى، شىعىندار – 12028,1 ملرد تەڭگە بولعان. وسىعان قاتىستى پرەمەر-مينيستر اسقار مامين: «تۇزەتىلگەن بيۋدجەت كىرىستەرى مەن شىعىستارى الەۋمەتتىك مىندەتتەردى شەشۋ ءۇشىن قوسىمشا قارجىلاندىرۋ قاجەتتىلىگىن جابۋعا، ەكونوميكالىق ءوسۋدىڭ قوسىمشا كوزدەرىن قۇرۋعا مۇمكىندىك بەرەدى»، – دەيدى. سونىمەن قاتار، مەملەكەتتىك ورگاندارعا بەلگىلەنگەن تارتىپتە «2019-2021 جىلدارعا ارنالعان رەسپۋبليكالىق بيۋدجەت تۋرالى» قازاقستان رەسپۋبليكاسىنىڭ زاڭىنا وزگەرىستەر ەنگىزۋ تۋرالى» زاڭ جوباسىن قر پارلامەنتىنىڭ قاراۋىنا ەنگىزۋدى تاپسىرىلدى.

كەزەكتى ۇكىمەت وتىرىسى بارىسىندا ۇلتتىق ەكونوميكا ءمينيسترى ر.دالەنوۆ نەگىزگى ماكروكورسەتكىشتەر جانە بيۋدجەت پارامەترلەرىنىڭ بولجامى تۋرالى بايانداما جاساپ، قارجى ءمينيسترىنىڭ ءبىرىنشى ورىنباسارى ب.شولپانقۇلوۆ 2019 جىلعا ارنالعان ناقتىلانعان رەسپۋبليكالىق بيۋدجەتتىڭ جوباسىمەن تانىستىردى. وسى رەتتە ەكونوميكالىق ءوسۋدىڭ قوسىمشا كوزدەرىن وڭدەۋ ونەركاسىبىن قولداۋعا ارنالعان قاراجاتتى قايتا ءبولۋ، سالىمشىلارعا تۇرعىن ءۇي قارىزدارىن بەرۋ ءۇشىن «قازاقستاننىڭ تۇرعىن ءۇي قۇرىلىس جيناق بانكى» اق نەسيەلەندىرۋ، پاۆلودار جانە اقتوبە وبلىستارىنىڭ سۇرانىسقا يە سۋارمالى جەرلەرىنىڭ گيدرومەليوراتيۆتى جۇيەلەرىن رەكونسترۋكتسيالاۋ، سونداي-اق جامبىل وبلىسىندا اۋىلدا كووپەراتسيانى دامىتۋدىڭ پيلوتتىق جوباسىن جۇزەگە اسىرۋ ارقىلى قۇرۋ جوسپارلانعان. وسى مىندەتتەردى 199,1 ملرد تەڭگە سوماسىندا شىعىستاردى قايتا ءبولۋ جانە وسى جىلدىڭ 9 ايىنىڭ قورىتىندىسى بويىنشا بيۋدجەت كىرىستەرىن 94,9 ملرد تەڭگە مولشەرىندە تۇزەتۋ جولىمەن قارجىلىق قولداۋ ۇسىنىلىپ وتىر.

"The Qazaq Times"