ەو يسپانيادان مەركەل – ماكرون تاندەمىن شىعارماق

ەۋروپالىق وداق يسپانيادان مەركەل –  ماكرون تاندەمىن جالعاستىرا الاتىن جاڭا ساياساتكەردى دايىنداماق. بىراق، يسپانياداعى ساياسي داعدارىس جالعاسا بەرسە، ەل ەۋروپالىق ينستيتۋتتارداعى ءوز الەۋەتىن جوعالتىپ، بەدەلىنە نۇقسان كەلتىرۋى مۇمكىن.

ەو-داعى دەرەككوزدەرگە سىلتەمە جاساعان El Pais باسىلىمىنىڭ مالىمەتىنشە، بريۋسسەل پيرەنەي كورولدىگىندەگى جاعدايدى مۇقيات قاداعالاپ وتىر. يسپانياداعى ءتورت جىلدىڭ ىشىندە كەزەكتى جالپى سايلاۋدى وتكىزۋ تۋرالى شەشىم ەۋروپانىڭ دامىعان ەلدەرى تاراپىنان مادريدكە دەگەن سەنىمگە كۇدىك ۇيالاتا باستاعان.

يسپانيا بيلىگى وسىعان دەيىن فەدەريكا موگەرينيدەن سوڭ ەو سىرتقى ساياسي قىزمەتىنىڭ باسشىسى لاۋازىمىنا جوزەپ بوررەلدىڭ كانديداتۋراسىن ۇسىنۋعا قول جەتكىزگەن بولاتىن. بريۋسسەلدەگى رەسمي وكىلدەر: «بىزگە مەركەل – ماكرون تاندەمىن تولىقتىرا الاتىن سوتسياليستىك كوشباسشى قاجەت بولدى جانە يسپانيا سياقتى پروەۋروپالىق ەلدە جاس تۇلعانىڭ ساياسي ارەنادا بوي تىكتەۋى ماڭىزدى»، – دەيدى.

28 ساۋىردە يسپانيادا وتكەن جالپىعا بىردەي سايلاۋ قورىتىندىسى بويىنشا يسپان سوتسياليستىك جۇمىس پارتياسى (يسرپ) جەڭىسكە جەتكەن. دەگەنمەن، ساياسي كۇش مينيسترلەر كابينەتىنىڭ باسشىسى لاۋازىمىنا سانچەستى ءوز بەتىنشە بەكىتۋدى ماقسات ەتتى. سوڭعى جىلدارى باسقارۋشى توپقا باستى وداقتاس رەتىندە تانىلعان «پودەموس» («ءبىزدىڭ قولىمىزدان كەلەدى!») پارتياسىمەن ۇكىمەت اراسىنداعى كەلىسسوزدەر تابىستى بولعان جوق. بۇل ساياسي كۇش كواليتسيالىق ۇكىمەتتىڭ قالىپتاسۋىن تالاپ ەتتى. يسپانيا كونستيتۋتسياسى بويىنشا، 23 قىركۇيەككە دەيىن پارلامەنتتىك توپتار ساياسي داعدارىستى شەشۋى ءتيىس بولاتىن. الايدا، ساياسي توپتار مەن بيلىك ورتاق كەلىسىسسوزگە قول جەتكىزە الماعاندىقتان، يسپانيادا كەزەكتەن تىس سايلاۋ وتەتىن بولدى.

"The Qazaq Times"