فوتو: ينوسمي

ۆەنەسۋەلانىڭ كونستيتۋتسيالىق بيلىگى جۇما كۇنى مەملەكەت باسشىسى نيكولاس مادۋرونىڭ قۇزىرەتتىلىگىن ارتتىراتىن زاڭنامالىق وزگەرىستەردى قابىلدادى. وپپوزيتسيا وكىلدەرى اتالعان وزگەرىستەرگە تولىقتاي قارسى شىعىپ، نيكولاس مادۋرونىڭ ديكتاتۋرا ورناتۋعا جاقىنداپ قالعانىن ايتادى. بۇل تۋرالى APF اقپاراتتىق اگەنتتىگى جازدى. 

ۆەنەسۋەلانىڭ حالىقتىق كوتەرىلىستەر مەن قارسىلىقتارعا قاراماستان سايلانعان قۇرىلتاي جينالىسى نيكولاس مادۋروعا بەيبىتشىلىك، قاۋىپسىزدىك، ازاماتتاردىڭ قۇقىقتارى، الەۋەمەتتىك-ەكونوميكالىق، قارجى جۇيەسىن رەتتەۋ، مەملەكەتتىك اكتيۆتەر ماسەلەلەرى بويىنشا زاڭنامالىق قۇزىرەتتىلىكتى بەرۋدى ءبىراۋىزدان قولداپ، داۋىس بەردى.

بۇل وقيعا ۆەنەسۋەلادا ءساۋىر ايىنان باستاپ جالعاسىپ كەلە جاتقان ساياسي داعدارىستىڭ شارىقتاۋ شەگى بولىپ، حالىق ارقىلى سايلانعان ۇلتتىق اسسامبلەيانىڭ قولىنداعى بارلىق بيلىكتى تارتىپ الدى.

وپپوزيتسيا كونستيتۋتسياعا وزگەرىستەر ەنگىزۋ ماقساتىندا قۇرىلادى دەپ جاريالانعان  قۇرىلتاي جينالىسىنىڭ ءبارلىو بيلىكتى قولىنا شوعىرلاندىرىپ وتىرعانىن، وسىلاي ەل پرەزيدەنتى حالىقتى الداعانىن ايتادى.  نيكولاس مادۋرونىڭ وتباسى مۇشەلەرى مەن سەرىكتەستەرىنەن جينالعان 545 ادامنان تۇراتىن قۇرىلتاي جينالىسىنا ەلدەگى بارلىق مەملەكەتتىك ورگاندار باعىناتىن بولادى. بۇل تۋرالى جۇما كۇنى زاڭعا ەنگىزىلگەن وزگەرىستەر بارىسىندا حابارلاندى.

قۇرىلتاي جينالىسى ءوز جۇمىسىن باستاعالى ءبىرىنشى كەزەكتە نيكولاس مادۋرونىڭ ساياساتىن قاتاڭ سىناعان ۆەنەسۋەلانىڭ باس پروكۋرورى لۋيزا ورتەگونى قىزمەتىنەن بوساتتى. لۋيزا ورتەگو: "مەنىڭ قولىمدا نيكولاس مادۋرو مەن ونىڭ سىبايلاستارىن تۇگەل اشكەرەلەيتىن دايەكتەر بار. وندا مەملەكەت باسشىسىنىڭ برازيلياداعى Odebrecht قۇرىلىس كومپانياسىنداعى جەمقورلىق داۋىنا قاتىسى بار ەكەنىن راستايتىن ايعاقتار بار. سوندىقتان دا ولار مەنى قۋدالاپ وتىر", - دەپ مالىمدەدى.

كەشە كەدەندىك پوليتسيا لۋيزا ورتەگونىڭ كۇيەۋىمەن بىرگە كولۋمبيادا ەكەنىن جەتكىزدى. كولۋمبيا مادۋرو ساياساتىنا قارسى بولىپ وتىرعان مەملەكەتتەردىڭ ءبىرى. بۇرىنعى باس پروكۋروردىڭ بۇل ەلدەن ساياسي باسپانا سۇرايتىنى نە ۋاقىتشا ايالداپ وتىرعانى ءالى بەلگىسىز.

اقش نيكولاس مادۋروعا قارسى سانكتسيالار جاريالاپ، مەملەكەت باسشىسى اۆتوريتارلىق ديكتاتۋراعا ۇمتىلۋدان باس تارتپايىنشا، امەريكانىڭ ەكونوميكالىق جانە ديپلوماتيالىق كۇشتەرىن تۇگەل ۆەنەسۋەلا حالقىنىڭ دەموكراتيا ورناتۋ جولىنداعى كۇرەسىنە كومەككە ارنايتىنىن حابارلادى.

دونالد ترامپتىڭ قاجەت بولعان جاعدايدا ۆەنەسۋەلاعا اسكەري ينتەرۆەنتسيا جاسايتىنى تۋرالى مالىمدەمەسىنىڭ سالدارىن جويۋعا نيەتتەنگەن مايك پەنس لاتىن امەريكاسى ەلدەرىنە ساپارى بارىسىندا كاراكاسقا ەكونوميكالىق قىسىم ارقىلى دا اسەر ەتۋگە بولاتىنىن ايتتى.

“The Qazaq Times”