اۋعانستانداعى سايلاۋ. فوتو: انادولى.

اۋعانستان ۇكىمەتى ەلدەگى ءالسىز بولسا دا دەموكراتيا قۇندىلىعىن ساقتاپ قالۋ ءۇشىن سايلاۋ وتكىزدى. سايلاۋ قارساڭىندا قاۋىپسىزدىك شارالارى كۇشەيتىلگەنىمەن، سايلاۋ كۇنىنىڭ وزىندە اۋعانستاندا 68 مارتە قارۋلى شابۋىل بولىپ، 4 قاۋىپسىزدىك قىزمەتكەر قازا تاپقان.

اۋعانستانداعى پرەزيدەنت سايلاۋىنىڭ ۇمىتكەرلەرى قاتارىندا وسىعان دەيىنگى پرەزيدەنت اشراف عاني مەن ونىڭ بۇرىنعى ساياسي وداقتاسى ابدوللا ابدۋللا باسەكەگە ءتۇستى. الايدا، ەلدىڭ باسىم كوپ اۋماعىن تالىپتەر باقىلاۋىنا الىپ تۇرعاندىقتان، كوپتەگەن ساراپشىلار كەزەكتى سايلاۋنىڭ لەگاتيمدىلىگىنەن كۇماندانادى. ەكى ساياساتكەر بيلىكتە وتىرعان 5 جىلدا اۋعانستانداعى زورلىقتى كۇش پەن قاقتىعىس كۇشەيگەن.

اۋعانستاندىقتاردىڭ باسىم كوبى ۇكىمەتكە سەنە بەرمەيدى. ءتىپتى بىرقاتارى سايلاۋعا داۋىس بەرۋدەن قورقادى. ولارعا اۋعانستان ۇكىمەتىن مويىندامايتىن تالىپتەردىڭ ىقپالى بار.

سايلاۋ كۇنى ەل كولەمىندە تالىپتەر جاعىنان 68 رەت قارۋلى شابۋى جاسالدى. ناتيجەسىندە، 4 قاۋىپسىزدىك قىزمەتكەرى قازا تاۋىپ، 72 ادام جاراقات العان. اۋعان ۇكىمەتى تالىپتەرگە باعىتتالعان 13 قارۋلى وپەراتسيادان 34 «تاليبان» مۇشەسى جويىلعانىن مالىمدەدى. ال، تالىپتەر جاساعان مالىمدەمەدە، ۇكىمەت كۇشتەرىنىڭ اۋىر شىعىنعا باتقانى ايتىلادى. ولار قاۋىپسىزدىك كۇشتەرىنەن ولگەندەر مەن جارالانعاندار بولىپ 400-دەن استام ادام زارداپ شەككەنىن ايتادى.

“The Qazaq  Times”