قىتايداعى سوت پروتسەسىنەن كورىنىس.

14 ناۋرىزدا قازاقستاننىڭ قىتايداعى ەلشىلىگىنىڭ كومەگىمەن جانە قر باس پروكۋراتۋراسىنىڭ قاتىسۋىمەن قىتايدا سوتتالعان جانە جازالارىن وتەپ جۇرگەن قازاقستاننىڭ ءۇش ازاماتى ەلگە قايتارىلدى. بۇل تۋرالى سىرتقى ىستەر مينيسترلىگىنىڭ رەسمي سايتىندا حابارلاندى.

سوتتالعان ازاماتتاردى ءوز وتانىنا بەرۋ تۋرالى ۋاعدالاستىققا بيىلعى
1 ناۋرىزدا قازاقستاننىڭ قىتايداعى ەلشىسى شاحرات نۇرىشەۆتىڭ قحر ادىلەت ءمينيسترىنىڭ ورىنباسارى ليۋ چجيتسيانمەن بولعان كەزدەسۋى كەزىندە قول جەتكىزىلدى.

قازىرگى تاڭدا قىتاي اۋماعىندا ءتۇرلى قىلمىستاردى جاساعانى ءۇشىن سوتتالعان 9 قازاقستاندىق ازامات قىتايدىڭ تۇزەتۋ مەكەمەلەرىندە جازالارىن وتەپ ءجۇر. «قازاقستان رەسپۋبليكاسى مەن قىتاي حالىق رەسپۋبليكاسى اراسىنداعى سوتتالعان ادامداردى بەرۋ تۋرالى شارتتىڭ» كۇشىنە ەنۋىن (2011 ج. 22 اقپاندا قول قويىلدى) ەسكەرە وتىرىپ، ەلشىلىكتىڭ كونسۋلدىق قىزمەتى قر ازاماتتارىنىڭ قۇقىقتارى مەن مۇددەلەرىن قورعاۋعا جانە سوتتالعان ازاماتتاردى وتانىنا قايتارۋعا باعىتتالعان ءتيىستى ءىس-شارالاردى جالعاستىرۋدا. جاقىن ارادا قىتاي تاراپىمەن قر-دىڭ تاعى دا قازاقستاننىڭ ءۇش ازاماتىن ەلگە قايتارۋ تۋرالى سۇراعى قاراستىرىلادى.

2015 ج. قىركۇيەكتەن باستاپ قىتايلىق تاراپپەن جازالاۋدىڭ ءتۇرلى مەرزىمىمەن قحر اۋماعىندا ايىپتارىن وتەپ جاتقان 14 قازاقستان ازاماتى تابىستالعانىن ەسكە سالامىز.

ەسكەرتپە: شەت مەملەكەتتەردەگى جەكە جانە زاڭدى تۇلعا بولىپ كەلەتىن قازاقستان رەسپۋبليكاسىنىڭ ازاماتتارىنىڭ قۇقىقتارى مەن مۇددەلەرىن قورعاۋ قر قحر-داعى ەلشىلىگىنىڭ كونسۋلدىق قىزمەتىنىڭ باستى باعىتتارىنىڭ ءبىرى.

«The Qazaq Times»