ترامپ بولتوندى قىزمەتىنەن بوساتتى

اقش پرەزيدەنتى دونالد ترامپ ۇلتتىق قاۋىپسىزدىك جونىندەگى كەڭەسشىسى دجون بولتوندى قىزمەتىنەن بوستاتتى.

ترامپ ءوزىنىڭ Twitter پاراقشاسىندا: «بۇگىن تاڭەرتەڭ دجوننىڭ وتستاۆكاسىنا قول قويدىم. وسى ۋاقىتقا دەيىن ەتكەن ەڭبەگى ءۇشىن العىس بىلدىرەمىن. جاڭا كەڭەسشىنى كەلەسى اپتادا تاعايىندايتىن بولامىن»، – دەپ جازدى. اق ءۇي باسشىسى دجون بولتوننىڭ بىرقاتار شەشىمدەرىن قۇپتامايتىندىعىن جانە كەڭەسشىمەن كەلىسپەۋشىلىكتەردىڭ ورىن العانىن ايتتى.

CNN تەلەارناسىنىڭ مالىمەتىنشە، ترامپ پەن بولتوننىڭ پىكىرى كوپ جاعدايدا سايكەس كەلمەگەندىكتەن، پرەزيدەنت ونىڭ وتستاۆكاسىن تالاپ ەتكەن. ماسەلەن، بولتوننىڭ يراك، يران جانە رەسەيگە قاتىستى پىكىرلەرىن ترامپ «الەمدىك ساياساتتاعى ۇلكەن قاتەلىك» دەپ باعالاعان. بولتوننىڭ ناقتى نەلىكتەن وتستاۆكاعا كەتكەنى رەسمي جاريالانباسا دا، شەتەلدىك باسىلىمدار اقش پەن «تاليبان» كەلىسسوزى وسىعان سەپ بولۋى مۇمكىن دەيدى.

70 جاستاعى دجون بولتون بىلتىر ساۋىردە ترامپتىڭ كەڭەسشىسى بولىپ تاعايىندالعان. بۇل قىزمەتىنە دەيىن ول قۇراما شتاتتارىنىڭ بۇۇ-داعى وكىلى جانە مەملەكەتتىك حاتشىنىڭ ورىنباسارى بولعان.

بولتون اقش پرەزيدەنتى قىزمەتىنەن بوساتقان ءتورتىنشى كەڭەسشى. وسىعان دەيىن ۇلتتىق قاۋىپسىزدىك كەڭەسشىسى لاۋازىمىن سيۋزان رايس، مايكل فلينن جانە گەربەرت ماكماستەر اتقارعان.

"The Qazaq Times"