گونكونگتاعى وقۋشىلار مەن ستۋدەنتتەر ەرەۋىلشىلەرگە قوسىلدى

گونكونگتا مىڭداعان وقۋشىلار مەن ستۋدەنتتەر ساباق تاستاپ، دەموكراتيانى تالاپ ەتكەن نارازىلىق شەرۋلەرىنە قوسىلدى. مالىمەتتەرگە قاراعاندا، جاڭا وقۋ جىلىنىڭ العاشقى كۇنىندە ەكى جۇزگە جۋىق مەكتەپتەن 10 مىڭنان استام وقۋشى  مەكتەپكە بارماعان.

وقۋشىلار مەن ستۋدەنتتەردىڭ بايكوت جاساۋى ەرەۋىلشىلەردىڭ ەكى كۇندىك جۇمىس تاستاۋ جانە اۋقىمدى نارازىلىق شەرۋىنە شاقىرۋىنا تۇسپا-تۇس كەلدى. وتكەن اپتا سوڭىنداعى نارازىلىق شەرۋلەرى كەزىندە ەرەۋىلشىلەر مەن پوليتسيا اراسىندا قاقتىعىس تا بولدى.

10 مىڭنان استام وقۋشى مەكتەپكە بارماي قالدى. فوتو: BBC.

سەنبى مەن جەكسەنبى كۇندەرى ەرەۋىلشىلەر پارلامەنت عيماراتىنا شابۋىل جاساپ، بوتەلكەگە قۇيىلعان بەنزيندەر ارقىلى ءورت قويعان. ال، پوليتسيا ەرەۋىلشىلەرگە قارسى جاساۋراتقىش گاز جانە رەزينە وقتاردى پايدالاندى، جاقىن كەلگەندەرى پوليتسيانىڭ سويىلىنا ءتۇستى.

جەكسەنبىدە ەرەۋىلشىلەر اۋەجايعا جالعاسقان جولداردى جاۋىپ تاستاعاندىقتان شەت قالالار مەن ەلدەرگە ساپارلايتىن جولاۋشىلار تەرمينالدارعا دەيىن جاياۋ بارۋىنا تۋرا كەلگەن بولاتىن. كەشكە قاراي ەرەۋىلشىلەر تەرمينالداردى دا جاۋىپ تاستاۋعا ارەكەت ەتتى. الايدا، قارۋلى پوليتسيا ولاردى اۋەجاي ىشىنە كىرگىزبەدى.

 “The Qazaq Times”