ەۋروپارلامەنت بەيجىڭ قىسقى وليمپيادا ويىندارىنا بويكوت جاريالاۋى مۇمكىن. فوتو: VOA

بۇگىن، 8 شىلدە بەيسەنبىدە ەۋروپا پارلامەنتى حوڭ كوڭ (گونكونگ) شەنەۋنىكتەرىنە سانكتسيا بەرۋ جانە شىڭجاڭداعى ادام قۇقىعىنىڭ بۇزىلۋىنا بايلانىستى بەيجىڭدەگى قىسقى وليمپيادا ويىندارىنا بويكوت جاريالاۋ ماسەلەسىن قاراستىرىلماق. ەۋروپا پارلامەنتىندەگى نەگىزگى ساياسي پارتيالار اتالمىش ۇسىنىس جوباسىن ءبىر كۇن بۇرىن دايىنداپ ۇلگىرگەن.

South China Morning Post باسىلىمىنىڭ حابارىنا قاراعاندا ەۋروپارلامەنتىنىڭ نەگىزگى پارتيالارى حوڭ كوڭداعى تاۋەلسىز اقپارات قۇرالدارىنىڭ جابىلۋىن قاتاڭ ايىپتاپ وتىر. اسىرەسە، بەيجىڭ بيلىگىنىڭ «Apple Daily» دەموكراتيالىق مەدياسىن بۇعاتتاپ تاستاۋى سانكتسيانىڭ باستى سەبەبىنە اينالعان.

حوڭ كوڭ شەنەۋنىكتەرىنە سانكتسيا سالۋ جانە بەيجىڭ قىسقى وليپيادا ويىندارىنا بويكوت جاريالاۋ بويىنشا ەۋروپارلامەنتتە بۇگىن داۋىس بەرىلەدى.  South China Morning Post باسىلىمى بولسا بۇل جوبا باسىم كوپ داۋىستىڭ قولداۋىمەن وتۋىنە ءشۇبا كەلتىرمەيدى.

سانكتسيا تىزىمىندە حوڭ كوڭ ۇكىمەتىنىڭ ەڭ جوعارى شەنەۋنىكتەرى ەنگەنىن دە ايتا كەتۋ كەرەك. سونداي-اق، قىتاي مەملەكەتتىك كەڭەسى حوڭ كوڭ جانە ماكاۋ (ماكاو) ىستەرى جونىندەگى كەڭەسىنىڭ ديرەكتورى شياۋ باۋلوڭ، بۇرىنعى باسشىسى جاڭ شياۋميڭ دا بار.

دەگەنمەن، ەو-نىڭ ساياسي ءىس-قيمىلدارىن بەلگىلەيتىن ەۋروپالىق كوميسسيا بولسا بۇل جوبالار بويىنشا ءالى ناقتى شەشىمىن بىلدىرگەن جوق.

وسىمەن ءبىر ۋاقىتتا بريتانيانىڭ دا نەگىزگى وپپوزيتسيالىق پارتياسى (ەڭبەك پارتياسى) بەيجىڭ تارابى بۇۇنىڭ شىڭجاڭداعى ادام قۇقىعىنىڭ بۇزىلۋىنا بويلانىستى تەرگەۋىن قابىل الماسا، بريتان ۇكىمەتى مەن كورولدىك وتباسىن 2022 جىلعى بەيجىڭ قىسقى وليپياداسىنا بويكود جاريالاۋعا شاقىردى.

بۇعان دەيىن بريتان بيلىگى شىڭجاڭ ماسەلەسىن حالىقارالىق تاۋەلسىز تەرگەۋ توبىنا بەرۋدى ۇسىنىپ كەلگەن. بىراق، بەيجىڭ قىسقى وليمپياداسىنا بويكوت جاريالاۋ تۋرالى ەشقانداي شەشىم قالىلداعان ەمەس. وتكەن ايدا اقش مەملەكەتتىك حاتشىسى بلينكەن بريتانيا ساپارى بارىسىندا وداقتاسىنىڭ بەيجىڭ قىسقى وليپيادا ويىندارىنا بويكوت جاريالاۋ بويىنشا كونسۋنسقا قول جەتكىزۋگە تىرىساتىنىن ايتقان. ال، سول كەزدە بەيجىڭ تارابى سپورتتى ساياسيلاندىرىپ جاتىر دەپ اقش-تى ايىپتاعان بولاتىن.

“The Qazaq Times”