تەھران يادرولىق كەلىسىمدى ساقتاپ قالۋ ءۇشىن فرانتسياعا بىرلەسە جۇمىس ىستەۋ تۋرالى ۇسىنىس ءبىلدىردى. بۇل تۋرالى يراننىڭ سىرتقى ىستەر ءمينيسترى مۇحاممەد دجاۆاد زاريف مالىمدەدى.

تاياۋدا فرانتسيا پرەزيدەنتى ەممانۋەل ماكرون يرانعا قارسى سانكتسيالىق قىسىمدى ازايتۋدى نەمەسە يسلام رەسپۋبليكاسى حالقىنىڭ جاقسى ءومىر سۇرۋىنە مۇمكىندىك بەرەتىن جولداردى قاراستىرۋدى ۇسىنعان. الايدا، ول ءۇشىن يران يادرولىق كەلىسىم شارتتارىن تولىقتاي ورىنداۋى قاجەت.

وسىعان دەيىن اتوم ەنەرگياسى جونىندەگى حالىقارالىق اگەنتتىك (ماگاتە) ساراپشىلارى يراننىڭ 2015 جىلدان بەرى العاش رەت بەلگىلەنگەن مەجەدەن ارتىق ۋران قورىن بايىتا باستاعانىن حابارلادى. ۆۆس مالىمەتىنشە، ەۋرووداق ەلدەرى يراننىڭ از بايىتىلعان ۋران قورلارىنىڭ 300 كيلوگرامدىق شەگىنەن اسىپ كەتپەۋىن قاداعالاۋ جونىندە كەلىسكەن. سەبەبى، اتالعان مەجە بۇۇ قاۋىپسىزدىك كەڭەسىنىڭ بەس تۇراقتى مۇشە ەلدەرى، گەرمانيا جانە يران اراسىنداعى كەلىسىمدە قاراستىرىلعان. ەۋروپالىق ديپلوماتتار وسى ماسەلەگە قاتىستى: «يران كەلىسىمدى ساقتاعان جاعدايدا ءبىز دە كەلىسىمگە ساي ارەكەت ەتەتىن بولامىز. ءبىزدىڭ تاراپ شارت تالاپتارىن بۇزعان ەمەس، بولاشاقتا دا سولاي بولماق. بىراق، يران دا كەلىسىمدى قاتاڭ ساقتاۋعا مىندەتتى»، – دەدى.

ايتا كەتەيىك، اقش يادرولىق كەلىسىمنەن شىققان سوڭ، ەۋروپا ەلدەرى مەن يران اراسىندا بىرقاتار ماسەلەلەر ورىن العان. ولاردىڭ قاتارىندا ورمۋز بۇعازىندا بريتانيالىق كەمەنىڭ ۇستالۋى جانە ۇلىبريتانيانىڭ يرانعا قارسى سانكتسيالار پاكەتىن ەنگىزۋى بار.

"The Qazaq Times"