قحر مەن كحدر شەكاراسى. فوتو: VOA.

قىتاي مەن سولتۇستىك كورەيانىڭ ەڭ جوعارى اسكەري لاۋازىمدىلارى بەيجىڭدە باس قوسىپ، ەكى ەل قارۋلى كۇشتەر اراسىندا جوعارى دەڭگەيدەگى الماسۋدى كۇشەيتۋ جونىندەگى مىندەتتەردى جاڭعىرتىپ، ەكى ەل ارمياسىنىڭ قاۋىپكە قارسى ىنتىماقتاستىعىن كۇشەيتۋ تۋرالى تالقىلاعان. بۇنداي مالىمەتتى امەريكالىق «اسسوشيەيتەد پرەسس» اگەنتتىگى حابارلادى. 

سەنبى كۇنى سولتۇستىك كورەيا جاڭا زىمىران سىناعىن وتكىزگەنى بەلگىلى بولعان ەدى. سول كۇنى جانە كحدر جوعارى اسكەري لاۋازىمدىلارى بەيجىڭدە قىتاي اسكەري شەندىلەرىمەن كەزدەسۋ وتكىزگەنى دە انىق بولدى. ەكى ەل اسكەري شەندىلەرىنىڭ كەزدەسۋى كحدر-نىڭ زىمىران سىناعىمەن قاتار كەلگەنى وڭتۇستىك كورەيا جانە اقش قورعانىس وكىلدەرىنىڭ نازارىن اۋدارعان. سولتۇستىك كورەيانىڭ اتالمىش زىمىران سىناعى اقش پەن وڭتۇستىك كورەيا اراسىنداعى بىرلەسكەن اسكەري جاتتىعۋعا قاراتقان جاۋابى رەتىندە باعالانىپ كەلگەن ەدى.

ال، قىتايدىڭ "شينحۋا" اقپاراتتىق اگەنتتىگىنىڭ بۇل تۋرالى حابارىندا، قحر ورتالىق اسكەري كوميسسياسىنىڭ توراعاسى جاڭ يۋشيا مەن كورەي حالىق ارمياسى ساياسي بيۋروسىنىڭ جەتەكشىسى كيم سۋ جىنىڭ كەزدەسكەنىن ايتقان.  قىتاي اسكەري شەندىسى كەزدەسۋدە قىتاي قارۋلى كۇشتەرىنىڭ بايلانىستى تەرەڭدەتۋگە مۇددەلى ەكەنىن، ىنتىماقتاستىق پەن ءوز ارا قولداۋدى كۇشەيتىپ، ايماقتىڭ قاۋىپسىزدى مەن تۇراقتىلىعىن ساقتاۋعا تىرىساتىنىن بىلدىرگەن.

قىتاي مەن سولتۇستىك كورەيا بۇعان دەيىن دە ماڭىزدى وداقتاس رەتىندە سانالاتىن. وتكەن عاسىردىڭ ورتا شەنىندەگى كورەي سوعىسى كەزىندە قىتاي كوممۋنيستىك رەجيمى "سولتۇستىك كورەياعا قولداۋ كورسەتىپ، اقش-قا قارسى تۇرۋ" ۇرانىن كوتەرىپ، كورەي تۇبەگىنە ميلليونداعان اسكەر اتتاندىرعان. الايدا، سول سوعىستاعى شىعىندارى دا وراسان زور بولعان. كورەي تۇبەگىنىڭ قازىرگىدەي كۇردەلى دە قايشىلىققا تولى كەزەڭىندە قىتاي مەن كحدر اراسىنداعى مۇنداي قادامدار اقش پەن وڭتۇستىك كورەيانى الاڭداتپاي قويمايدى.

“The Qazaq Times”