جاكارتا قالاسى سازعا باتىپ كەتۋى مۇمكىن. فوتو: GETTY IMAGES/BBC,

يندونەزيانىڭ ورتالىق قالاسى جاكارتا (دجاكارتا) تەز قارقىنمەن سۋعا شوگىپ بارا جاتقان قالالاردىڭ ءبىرى. مالىمەتتەرگە قاراعاندا قالانى سۋ باسۋ قارقىنى وسى قالپىن ساقتاسا 2050 جىلعا بارعاندا جاكارتانىڭ باسىم بولەگى سۋ استىندا قالماق. وسىعان بايلانىستى يندونەزيا پرەزيدەنتى جوكو ۆيدودو ەل پارلامەنتىنە ۇسىنىس جاساپ، ەل استاناسىن جاكارتادان بورنەو ارالىنا كوشىرۋدى سۇرادى. 

يندونەزيانىڭ اقپارات قۇرالدارى بورنەو ارالىنداعى پالانگكارايا قالاسى ەل ورتالىعى بولۋى مۇمكىن ەكەنىن ايتىپ جاتىر. قالانىڭ سۋ استىندا قالۋىنان تىس وزگە دە سەبەپتەر جاكارتادان ەل ورتالىعىن الىپ كەتۋ ماسەلەسىن كوتەرتكەن. سونىڭ ءبىرى – كولىك كەپتەلىسى. 2016 جىلعى زەرتتەۋ ناتيجەسىنە سايكەس جاكارتا الەمدەگى كولىك كەپتەلىسى ەڭ كوپ بولاتىن قالا بولىپ سانالعان. رەسمي مالىمەتتەرگە سەنسەك، كولىك كەپتەلىسىن رەتكە سالۋ ءۇشىن ەل ۇكىمەتى جىلىنا 6,8 ملرد اقش دوللارىن جۇمسايدى ەكەن.

جاكارتا جاۆا تەڭىزىنىڭ جاعاسىنداعى سازدا ورنالاسقان قالا. ءبىر قالانىڭ وزىنەن 13 داريا اعىپ ءوتىپ تەڭىزگە قۇيادى. وسىعان قاراپ جاكارتاداعى سۋ تاسقىندارىنا تاڭقالۋعا بولمايتىنىن بىلەمىز. بىراق، قالانى سۋ باسۋعا سۋ تاسقىنى ەمەس، قالانىڭ سازعا باتىپ بارا جاتقانى سەبەپ بولىپ وتىر. زەرتتەۋشىلەر جاعدايدىڭ شۇعىل قيىنداپ كەتۋى دە مۇمكىن دەيدى. ياعني، قالا قىسقا عانا ۋاقىتتا سۋ استىندا قالۋى دا عاجاپ ەمەس.

قالانى 13 ۇلكەن داريا كەسىپ وتەدى. فوتو: tourprom.ru.

سوڭعى 10 جىل ىشىندە قالانىڭ وڭتۇستىگى 2,5 مەتر شاماسىندا سۋعا شوگە تۇسكەن. قالاعا جاقىن كەيبىر ايماقتار بۇدان دا تەز قارقىنمەن سۋ استىنا باتىپ بارادى.

ساناۋلى ەلدەر بولماسا، كوپتەگەن ەلدىڭ ورتالىق قالاسى ەل تەرريتورياسىنىڭ ورتالىق بولەگىنە ورنالاسقان. يندونەزيا دا كەيبىر ايماقتاردىڭ اۆتونوميا تالاپ ەتىپ، دەربەستىككە ۇمتىلۋىنا قارسى بورنەو ارالىن كوزدە ۇستاپ وتىر. ەل استاناسىن كوشىرۋ تاجريبەلەرى الەم ەلدەرىندە جوق ەمەس. ورتالىق قالاسىن كوشىرۋ تاجريبەسى بار ەلدەر قاتارىندا قازاقستاندى دا قوسۋعا بولادى.

“The Qazaq Times”