ءۇندىستان كاشميردىڭ اۆتونوميالىق ستاتۋسىن الىپ تاستاۋى مۇمكىن

كاشميردىڭ ءۇندىستان باسقارعان ايماعى اۆتونومياسىنان ايرىلۋى مۇمكىن. بۇل تۋرالى ءۇندىستاننىڭ پرەمەر-ءمينيسترى نارەندرا مودي ءبىر كۇن بۇرىنعى ەل تاۋەلسىزدىك كۇنىنە ارنالعان سالتاناتتى شارادا ورتاعا سالدى. 

"كاشمير ايماعى ەندى بۇرىنعى قۋاتىنا قايتادى", – دەپ باستاعان مودي سوزىندە – " كاشمير تۇرعىندارىنىڭ تالاپ-تىلەگىن ورىنداۋ ءبىزدىڭ مىندەتىمىز. ولاردىڭ ارمان-تىلەگىن جۇزەگە اسىرۋ ءبىزدىڭ جاۋاپكەرشىلىگىمىزدە. ول ءۇشىن ءۇندىستاننىڭ 1 ملرد 300 ملن حالقى شۇعىل ارەكەت ەتۋى كەرەك. ماقساتىمىزعا جەتۋ ءۇشىن تاپ بولعان ءتۇرلى كەدەرگىلەردەن ءوتىپ كەلەمىز", – دەگەن.

ءۇندىستان باسشىسىنىڭ بۇل سوزىنەن كەيىن پاكىستان پرەمەر-ءمينيسترى بىردەن مالىمدەمە جاساپ، حالىقارالىق قاۋىمداستىقتى كاشمير تاقىرىبىنا نازار اۋدارۋعا شاقىردى. يمران حان  ءوزىنىڭ الەۋمەتتىك جەلىدەگى مالىمدەمەسىندە: "مەن حالىقارالىق قاۋىمداستىققا ەسكەرتۋ جاساعىم كەلەدى. ەگەر بۇعان جول بەرسەڭدەر، زاردابى تىم اۋىر بولادى. مۇسىلمان جۇرتشىلىعىندا زورلىق-زومبىلىق پەن راديكاليزم كۇشەيىپ كەتۋى مۇمكىن", – دەگەن.

سوڭعى ەكى جىلدان بەرى ءۇندىستان مەن پاكىستان اراسىنداعى تاريحي تالاس-تارتىسقا تولى داۋ-داماي قايتا ۋشىقتى. ءتىپتى، ەكى ەلدىڭ شەكارالاس ايماقتارىندا قارۋلى قاقتىعىستار دا بولدى. كەزەكتەسكەن اۋە كەمەلەرىن اتىپ ءتۇسىرۋ ارەكەتتەرى دە ورىن الدى. بۇل قايشىلىقتاردى شەشۋ ماقساتىندا يمران حان مەن نارەندرا مودي كەلىسسوزگە تالپىنىس جاساپ تا كوردى. الايدا، تاريحى تەرەڭگە كەتكەن قايشىلىق تۇبەگەيلى شەشىم تابار ءتۇرى جوق.

“The Qazaq Times”