Brexit: ۇلىبريتانيا ەۋرووداقپەن كەلىسىمگە كەلۋگە دايىن

ۇلىبريتانيا ەۋروپالىق وداقپەن Brexit بويىنشا كەلىسسوزدەر جۇرگىزۋگە دايىن. بۇل تۋرالى ەلدىڭ جاڭادان سايلانعان پرەمەر-ءمينيسترى بوريس دجونسون بەلگيا پرەمەرى شارل ميشەلمەن اڭگىمە بارىسىندا مالىمدەدى.

بوريس دجونسون سوزىندە لوندون بريۋسسەلمەن كەلىسسوزدەردى جالعاستىرىپ، تەرروريزممەن كۇرەس، ساۋدا بايلانىسى جانە قاۋىپسىزدىك ماسەلەلەرىن بۇرىنعىداي تالقىلايتىنىن ايتتى. سونىمەن قاتار، تاراپتار «بەكستوپ» جوباسىنا (سولتۇستىك يرلانديانىڭ ەو-داعى كەدەندىك وداق قۇرامىنا ەنۋى) دا جەكە توقتالىپ ءوتتى.

Brexit بويىنشا كەلىسسوزدەردەگى ەو باس وكىلى ميشەل بارنە: «بريتانيا ماسەلەسىن شەشۋدى قولعا الدىق. مۇنىڭ سوڭى وداق قۇرامىنداعى وزگە دە دەموكراتيالىق ينستيتۋتتاردىڭ باسقارىلۋىنا قاتەر توندىرمەۋى كەرەك. ەگەر دە مەي ۇكىمەتى Brexit بويىنشا مەرزىمدى ۇزارتۋدى سۇراسا، مۇنى ەۋرووداققا مۇشە 27 ەلدىڭ باسشىسى بەكىتۋى ءتيىس»، – دەيدى. وسىعان دەيىن بريتانيانىڭ بۇرىنعى پرەمەر-ءمينيسترى تەرەزا مەي پارلامەنتكە ەۋروپالىق وداق قۇرامىنان شىعۋدىڭ «ب» جوسپارىن ۇسىنعان بولاتىن. الايدا، بريتان پارلامەنتى مەيدىڭ ۇسىنىسىن قابىلداۋدان باس تارتقان.

نەگىزىنەن ۇلىبريتانيانىڭ ەو قۇرامىنان شىعۋىنا قاتىستى شەتەلدىك باق، ساياساتكەرلەر جان-جاقتى پىكىر بىلدىرگەن. ماسەلەن، گەرمانيالىق جانە فرانتسيالىق ساراپشىلار «بىرىككەن كورولدىك ەۋرووداقتان شىعاتىن بولسا، ءسوزسىز ۇتىلادى» دەپ ەسەپتەيدى. سەبەبى، يرلانديا مەن سولتۇستىك يرلانديا شەكاراسىنداعى ماسەلە مەن الداعى ۋاقىتتا بريتانيانىڭ ەۋروپا ەلدەرىمەن ءوزارا قارىم-قاتىناسىن شەشۋ ماسەلەسى ءالى دە تالقىلانىپ كەلەدى. وسىعان بايلانىستى يرلانديانىڭ سىرتقى ىستەر ءمينيسترى سايمون كوۆني: «بريتانيانىڭ مينيسترلەرىمەن كەزدەسىپ، ءبىراز ماسەلەلەردى تالقىلادىق. ءبىزدىڭ تاراپتىڭ ويىنشا، بىرىككەن كورولدىكتىڭ وداق قۇرامىنان شىعۋ كەلىسىمى وسى ايدا بەكىتىلگەنى دۇرىس بولادى»، – دەپ مالىمدەدى.

Brexit بويىنشا كەلىسسوزدەر 2017 جىلدان بەرى جالعاسىپ كەلەدى. 2016 جىلعى رەفەرەندۋم بويىنشا ۇلىبريتانيا 29 ناۋرىزدا ەۋروپالىق وداق قۇرامىنان شىعۋى ءتيىس بولاتىن. الايدا، تاراپتار ورتاق كەلىسىمگە كەلە الماعاندىقتان، Brexit ۋاقىتى ەكى رەت كەينگە شەگەرىلگەن. تاياۋدا ءمالىم بولعانداي، رەسمي بريۋسسەل ۇلىبريتانيانىڭ ەۋرووداق قۇرامىنان 31 قازاندا شىعاتىنىن ايتتى. ەگەر بۇل كەزەكتى مارتە ءساتسىز اياقتالسا، بريتانيا وداق قۇرامىنان كەلىسىمشارتسىز شىعۋى ءتيىس.

"The Qazaq Times"