قر پارلامەنتى زالى. فوتو: parlam.kz

بۇگىن كەشكە قاراي اقوردا ءباسپاسوز قىزمەتىنىڭ حابارلاۋىنشا، پرەزيدەنت قاسىم-جومارت توقاەۆتىڭ جارلىقتارىمەن قازاقستان رەسپۋبليكاسى پارلامەنتى سەناتىنىڭ دەپۋتاتتارى بولىپ

مۇحتار ابرارۇلى قۇل-مۇحاممەد;

اندرەي يۆانوۆيچ لۋكين;

داريعا نۇرسۇلتانقىزى نازارباەۆا;

ءلاززات جاڭىلىسقىزى سۇلەيمەن;

دانا ومىربايقىزى نۇرجىگىتوۆا;

ءجۇسىپ بايتىلەسۇلى نۇرتورە;

اسقار ورازالىۇلى شاكىروۆ;

قاناتبەك بەيسەنبەكۇلى سافينوۆ تاعايىندالدى. سونىمەن قاتار، وسى ۋاقىتقا دەيىن پارلامەنت سەناتىنىڭ دەپۋتاتتارى لاۋازىمىندا بولعان سەرگەي گروموۆ، گەورگي كيم، دۋلات قوسداۋلەتوۆ، راشيد تۇسىپبەكوۆ، اسقار بەيسەنباەۆ پەن بىرعانىم ءايتىموۆالاردىڭ وكىلەتتىكتەرى توقتاتىلعان. بۇل تۋرالى قر پرەزيدەنتىنىڭ ءباسپاسوز حاتشىسى بەرىك ءۋالي دە ءوز پاراقشاسىندا ءبولىسىپ، راستاعان.

پارلامەنت سەناتى دەپۋتاتتىعى مانداتىنا تاعايىندالعانداردىڭ كوپشىلىگى "نۇر وتان" پارتياسىنىڭ مۇشەلىگىندەگىلەر مەن بيىل كەزەكتەن تىس وتكىزىلگەن 9 ماۋسىمداعى قر پرەزيدەنتىن سايلاۋ كەزىندە قاسىم-جومارت توقاەۆتىڭ كانديداتتىعىن قولداپ، ۇگىتتەگەندەر.

جاڭا قىزمەتكە كەلگەندەرگە ساتتىلىك تىلەي وتىرىپ، ازاماتتىق قوعام مەن دەموكراتيالىق پرينتسيپتەردىڭ ورنىعۋىنا كۇش سالىپ، ەلىمىزدىڭ گۇلدەنۋىنە اتسالىساتىنىنا سەنىم بىلدىرەمىز!

"The Qazaq Times"