رەسەي كالينينگرادقا "يسكاندەر" زىمىراندارىن ورناتىپ، ەۋروپانىڭ زارە-قۇتىن ۇشىرۋدا

مءاسكەۋدىڭ كالينينگرادقا "يسكاندەر" زمىراندارىن تۇراقتى ورناتۋ تۋرالى شەشىمى ەۋروپا قاۋىپسىزدىگىنە قءاۋىپ تءوندىرەدى دەپ مءالىمدەدى گەرمانيا سىرتقى ىستەر ءمينيسترى زيگمار گابريەل "ينتەرفاكس" اگەنتتىگىنە بەرگەن سۇحباتىندا. بۇل تۋرالى centralasian.org جازادى. 

رەسەي وتكەن جىلى كالينينگرادقا يادرولىق وقتۇمسىعى بار بالليستيكالىق زىمىراندار جەتكىزىپ، س-400 اۋە شابۋىلىنان قورعانىس جۇيەسىن ورناتقان. رەسەي بۇل قارۋ-جاراقتار اسكەري جاتتىعۋ اياسىندا ورنالاستىرىلدى دەيدى. بىراق باتىس ەلدەرىنىڭ اسكەر باسىلارى بۇل قارۋ-جاراقتار كالينينگرادتا ۇزاق مەرزىمگە قالدىرىلۋى مۇمكىن دەپ قاۋىپتەنەدى.

"كالينينگرادتا "يسكاندەر" زىمىراندارىن ۇزاق مەرزىمگە ورناتۋ ۇلكەن الاڭداۋشىلىققا جانە ەۋروپانىڭ قاۋىپسىزدىگىنە سوققى جاساۋعا سەبەپ بولادى. ءبىز وسى سەبەپتەن كالينينگرادتا نە بولىپ جاتقانىن مۇقيات باقىلاپ وتىرامىز" دەدى زيگمار گابريەل.

كەيبىر "يسكاندەر-م" زىمىراندارى ۇشىرىلعان جەرىنەن باستاپ 700 كيلومەتر قاشىقتىقتاعى نىساناعا ءدال ءتيىپ، قيراتا الادى. گابريەل رەسەيدىڭ پولشا مەن بالتىق ەلدەرىنە ناتو-نىڭ ءتورت مىڭ ساربازىنىڭ، ونىڭ ىشىندە ليتۆاعا 400 نەمىس سولداتىنىڭ ورنالاستىرىلعانىنا بايلانىستى سىنىن قابىلدامادى. "گەرمانيا مەن ناتو-نىڭ وزگە ەلدەرى بالتىق بويىنا ءبىرىنشى رەت كىرىپ وتىرعان جوق" دەگەن گابريەل ايماقتاعى نەمىس اسكەرىنىڭ سانى رەسەيدىڭ ايماقتا جاپپاي كۇشەيتىپ جاتقان اسكەري قۋاتىمەن سالىستىرعاندا الدەقايدا از ەكەنىن ايتتى.

گابريەل بۇل تۋرالى 9 ناۋرىزدا ماسكەۋگە ساپارىنىڭ قارساڭىندا ايتتى. 9 ناۋرىزدا ول ماسكەۋدە رەسەي سىرتقى ىستەر ءمينيسترى سەرگەي لاۆروۆپەن كەزدەسەدى.

«The Qazaq Times»