اقش پرەزيدەنتى دونالد ترامپ. فوتو: https://4esnok.bۋ

اقش پرەزيدەنتى دونالد ترامپ سكريپال ىسىنە بايلانىستى رەسەيگە قارسى سانكتسيا ەنگىزۋ تۋرالى قاۋلىنى بەكىتتى. كەزەكتى سانكتسيا پاكەتى ۇلىبريتانيانىڭ سولسبەري قالاسىندا ەكس-تىڭشى سەرگەي سكريپال مەن قىزى يۋليانىڭ رەسەيدە جاسالعان «نوۆيچوك» قۋاتتى حيميالىق قارۋىنان ۋلانۋىنا قاتىستى.

امەريكالىق «The New York Times» جانە «Politico» باسىلىمدارىنىڭ مالىمەتىنشە، سانكتسيا كۇشىنە ەنگەننەن كەيىن رەسەيلىك بيرجاداعى ونىمدەر باعاسى ساناۋلى مينۋتتار ىشىندە 1,5-2%-عا تومەندەگەن. بىرنەشە كۇن بۇرىن دەموكراتتار اق ءۇي باسشىسىنىڭ رەسەيگە قارسى سانكتسيا ەنگىزۋىنە قارسى شىققانمەن، سەنات بۇل قاۋلىنى بەكىتتى.

New York Times تىلشىلەرىنىڭ ايتۋىنشا، اقش-تىڭ كەزەكتى سانكتسياسىمەن ۋاشينگتوننىڭ ماسكەۋگە كورسەتىپ وتىرعان قارجىلىق كومەگىنە تىيىم سالىنۋى مۇمكىن. اتاپ ايتقاندا، قاۋلى حالىقارالىق ۇيىمداردىڭ رەسەيگە نەسيە بەرۋىنە جانە امەريكالىق-رەسەيلىك بانكتەر اراسىنداعى بايلانىسقا قارسى باعىتتالماق. اقش-تىڭ بۇل سانكتسياسى 1991 جىلى قابىلدانعان حيميالىق جانە بيولوگيالىق قارۋ شىعارۋشى مەملەكەتتەردى قاداعالاۋ تۋرالى زاڭعا سۇيەنىپ جۇزەگە اسىپ وتىر.

بيىل شىلدەدە كونگرەسستە وتكەن جيىندا قوس دەموكرات – ەليوت ەنگەل مەن مايكل ماككولل پرەزيدەنت ترامپقا رەسەيگە قارسى سانكتسيالاردىڭ ەكىنشى پاكەتىن ازىرلەۋ تۋرالى ۇسىنىس بىلدىرگەن. دەموكراتتار تارابىنان جازىلعان حاتتا: «2018 جىلدىڭ 27 تامىزىندا كۇشىنە ەنگەن سانكتسيالار بارلىق تالاپتارعا ساي جۇزەگە استى. حيميالىق جانە بيولوگيالىق قارۋ شىعارۋشى مەملەكەتتەردى قاداعالاۋ تۋرالى زاڭ بويىنشا رەسەيگە سانكتسيالاردىڭ ەكىنشى پاكەتىن ەنگىزۋدى سۇرايمىز. سەبەبى، بريتانيادا ورىن العان جاعداي تاعى دا قايتالانۋى مۇمكىن»، – دەلىنگەن.

اقش سوڭعى جىلدارى رەسەيگە بىرنەشە مارتە سانكتسيالار پاكەتىن ەنگىزدى. ءبىر جىل بۇرىن ۋاشينگتون ماسكەۋگە سكريپال ىسىنە قاتىستى العاشقى سانكتسيالاردى ەنگىزگەن. قاتاڭ قاۋلىلاردىڭ العاشقى بولىمىنە شەتەلدىك ساراپشىلار «ايداھاردىڭ سوققىسى» دەپ باعا بەردى. سەبەبى، سانكتسيالاردىڭ العاشقى پاكەتى رەسەيدىڭ جەكەلەگەن تۇلعالارىنا (مينيستر، دەنساۋلىق ساقتاۋ سالا ماماندارى) ەنگىزىلگەنىمەن، ەكىنشى پاكەتى ەل ەكونوميكاسىن تىعىرىققا تىرەگەن. ال 2014 جىلى رەسمي ۋاشينگتون قىرىم اننەكسياسى مەن دونباسستا ورىن العان قاقتىعىسقا بايلانىستى ماسكەۋ ەكونوميكاسىنا باعىتتالعان سانكتسيالار ءتىزىمىن جاريالادى.

"The Qazaq Times"