ترامپ قىتاي تاۋارلارىنا باج سالىعىن ەنگىزبەك

اقش پرەزيدەنتى دونالد ترامپ قۇراما شتاتتار 1 قىركۇيەكتەن باستاپ قىتايعا قۇنى $ 300 ملرد. بولاتىن تاۋارلارعا 10% كولەمىندە جاڭا باج سالاتىنىن مالىمدەدى.

«قىتايمەن ساۋدا كەلىسسوزدەرى جالعاسۋدا جانە وسى كەلىسسوزدەر كەزىندە اقش 1 قىركۇيەكتە قىتايدان كەلگەن قالعان تاۋارلار مەن ونىمدەرگە $300 ملرد. سوماعا 10% كولەمىندە شاعىن قوسىمشا باج سالىعىن ەنگىزەتىن بولادى»، – دەپ جازدى ترامپ Twitter پاراقشاسىندا. ونىڭ ايتۋىنشا، جاڭا شەشىم وسىعان دەيىنگى كۇشىنە ەنگەن قۇنى $250 ملرد. بولاتىن تاۋارلارعا 25% كولەمىندە قولدانىستاعى باجدى قامتىمايدى.

اقش پرەزيدەنتى قىتاي قۇراما شتاتتاردان اۋىل شارۋاشىلىعى ونىمدەرىن كوپ مولشەردە ساتىپ الماعانىن جانە اقش-تا جىل سايىن مىڭداعان ادامنىڭ قايتىس بولۋىنا اكەپ سوعاتىن فەنتانيل وپيويدتى پرەپاراتىن ساتۋدى توقتاتپاعانىن دا ايتتى. اق ءۇي باسشىسى قىتايمەن جان-جاقتى ساۋدا كەلىسىمى بويىنشا ديالوگتاردىڭ ءوز جالعاسىن تابۋى مۇمكىن ەكەنىن ايتتى.

قحر مەن اقش بىرنەشە اي بويى ساۋدا داۋلارىن رەتتەۋ تۋرالى كەلىسسوزدەر جۇرگىزدى. كەلىسسوزدەردىڭ سوڭعى (11-ءشى) راۋندى مامىردا امەريكا استاناسىندا وتكەن. الايدا وسىدان كەيىن ەكى ەل بايلانىسى بۇرىنعىدان دا ۋشىعا ءتۇستى. 10 مامىردا ۋاشينگتون $200 ملرد سوماسىنا قىتاي ونىمىنە قوسىمشا باج سالىعىن ەنگىزىپ، جالپى مولشەرلەمەنى 10%-دان 25%-عا دەيىن كوتەردى. ماۋسىمنىڭ باسىندا قىتاي ۇكىمەتى $60 ملرد اقش-تىڭ 5 مىڭنان استام تاۋارلارىنا قارسى باج سالىعىن ەنگىزگەن.

28-29 ماۋسىمدا وساكا قالاسىندا وتكەن جيىرمالىق (G20) سامميتىندە اقش پرەزيدەنتى ترامپ پەن قىتاي توراعاسى شي ءجيڭپيڭنىڭ كەزدەسۋى بارىسىندا قوس تاراپ كونسۋلتاتسيالاردى قايتا جاڭعىرتۋ تۋرالى شەشىمگە كەلگەن. امەريكالىق كوشباسشى قىتايدان كەلگەن تاۋارلارعا جاڭا تاريفتەر ەنگىزبەۋگە، سونداي-اق Huawei كومپانياسىنىڭ قىزمەتىنە شەكتەۋلەردى جەڭىلدەتۋگە ۋادە بەردى. وعان جاۋاپ رەتىندە بەيجىڭ قۇراما شتاتتاردان اۋىل شارۋاشىلىعى ونىمدەرىن ساتىپ الۋ كولەمىن ارتتىرۋعا دايىن ەكەنىن ايتقان. دەگەنمەن، شەتەلدىك باسىلىمداردا جازىلعانداي، قىتاي تارابى ءوز ۋادەسىن تولىقتاي ورىنداماعان.

"The Qazaq Times"