ءبىلىم گرانتى يەگەرلەرىنىڭ ءتىزىمى جاريالاندى

1 تامىزدا ءبىلىم گرانتى يەگەرلەرىنىڭ ءتىزىمى جاريالاندى. بۇل تۋرالى قر ءبىلىم جانە عىلىم مينيسترلىگى حابارلادى.

بيىلدان باستاپ ءبىلىم بەرۋ گرانتتارى ءبىلىم باعدارلامالارى توپتارى بويىنشا تاعايىندالادى. ياعني، ءار تالاپكەر جوعارى وقۋ ورنىنا ءتۇسۋ كەزىندە ناقتى ءبىلىم بەرۋ باعدارلاماسىن تاڭدادى. وسىمەن ءۇشىنشى جىل قاتارىنان «التىن بەلگى» توسبەلگىسىنىڭ يەگەرلەرى، جالپى ءبىلىم بەرەتىن پاندەر بويىنشا حالىقارالىق جانە رەسپۋبليكالىق وليمپيادا، عىلىمي، سپورت جارىستارىنىڭ جەڭىمپازدارى ۇبت ناتيجەسىنە دەڭگەيى تەڭ بولعان جاعدايدا عانا باسىمدىققا يە بولادى. باسقا جاعدايلاردا، ولار گرانتتىق كونكۋرسقا تەڭ شارتتاردا قاتىسادى.

گرانت يەگەرلەرىنىڭ تولىق ءتىزىمىن ۇلتتىق تەستىلەۋ ورتالىعىنىڭ سايتىندا، «ەگەمەن قازاقستان»، «كازاحستانسكايا پراۆدا»، Zakon.kz, Tengrinews.kz, Informburo.kz جانە «بايقاۋدىڭ ناتيجەلەرىن ءبىلىڭىز» تەلەگرامماسى ارقىلى بىلۋگە ​​بولادى.

ايتا كەتەيىك، بيىلعى وقۋ جىلىنا جالپى سانى 53 مىڭ 700 گرانت بولىنگەن. سونىمەن قاتار، پرەزيدەنت قاسىم-جومارت توقاەۆتىڭ تاپسىرماسى بويىنشا كوپ بالالى وتباسىدان شىققان تۇلەكتەرگە 5 مىڭ گرانت بەرىلەدى. ياعني ول مەجەلى بالدى جيناپ، بىراق وقۋعا تۇسە الماعان كوپ بالالى وتباسىلاردان شىققان تۇلەكتەرگە ۇلەستىرىلەدى. وعان وتىنىشتەر 5-10 تامىز ارالىعىندا قابىلدانىپ، قورىتىندى 25 تامىزدا جاريالانادى.

"The Qazaq Times"