قازاقستان ىشكى ىستەر ءمينيسترى ەرلان تۇرعىمباەۆ وسىدان ءبىر كۇن بۇرىن ازاتتىق تىلشىلەرىنە جاسالعان شابۋىلعا قاتىستى پىكىر ءبىلدىرىپ، الماتىدا ءباسپاسوز ءماسليحاتىنىڭ الدىندا بولعان وقيعانى «ەكى تاراپتىڭ جانجالى» دەپ اتادى.
23 شىلدەدە نۇر-سۇلتاندا ۇكىمەت وتىرىسىنان شىققان سوڭ جۋرناليستەر سۇراعىنا جاۋاپ بەرگەن مينيستر تۇرعىمباەۆ: «كەشە الماتىدا بريفينگ، يا ءباسپاسوز ءماسليحاتىن وتپەك بولعاندا ەكى جاق ءوزارا جانجالداسىپ قالدى. ەكى تاراپدىڭ ءبىرى جاراقاتتانعانىن ايتىپ، ەكىنشىسى بۇزاقىلىق جاسالعانى جايلى (پوليتسياعا) ارىزداندى. ءار تاراپ پوليتسياعا، دارىگەرلەرگە كومەككە جۇگىنگەن. قازىر ەكى ارىز تىركەلگەن، ءمان-جايدى انىقتايمىز»، – دەدى.
كەشە ازاتتىق ءتىلشىسى نۇرگۇل تاپاەۆا مەن وپەراتور توقمولدا قۇسايىنوۆقا بەلگىسىز بىرەۋلەر شابۋىل جاسادى. ازاتتىق تىلشىلەرى تاڭەرتەڭگى ساعات 11-دە الماتىداعى ادام قۇقىقتارى مەن زاڭدىلىقتى ساقتاۋ بيۋروسىنداعى ءباسپاسوز جيىنىنا بارعان. عيماراتتىڭ ءبىرىنشى قاباتىندا جۋرناليستەرگە تارپا باس سالعان بەس ايەل ازاتتىق تىلشىلەرىنە قول جۇمساپ، تەحنيكاسىن ءبۇلدىردى.
بۇگىن جەلىدە ازاتتىقتان «كەشىرىم سۇراعان» ەكى ايەلدىڭ ءسوزى جازىلعان ۆيدەو تارادى. وندا اتى-ءجونىن اتاماعان ايەلدەر الماتىداعى ادام قۇقىعى مەن زاڭدىلىقتى ساقتاۋ بيۋروسىنىڭ «ءباسپاسوز زالىنا كىرە الماي، دورەكى ءسوز ەستىگەننەن كەيىن» ۇرىسىپ، الگىندەي قىلىققا بارۋعا ءماجبۇر بولعانىن ايتادى.
كەيىننەن الماتى قالاسى پوليتسيا دەپارتامەنتى ازاتتىق جانە باسقا باسىلىمداردىڭ تىلشىلەرىنە شابۋىل وقيعاسىنا قاتىستى قىلمىستىق كودەكستىڭ «ءوز بەتىنشە بيلىك ەتۋ» بابى (389-باپ) بويىنشا سوتقا دەيىنگى تەرگەۋ باستالعانىن مالىمدەدى.
كيبەرشابۋىلعا ۇشىراعان باق وكىلدەرى قۇقىق قورعاۋ ورگاندارىنا ارىز ءتۇسىردى
Oyan, Qazaqstan قوزعالىسىنىڭ تاعى ءبىر بەلسەندىسىن پوليتسيا بولىمىنە شاقىردى
ورتالىق ازيا: تاريحي، ساياسي جانە ەكونوميكالىق مۇددەلەر اياسىندا
قىرعىزستاندا تاۋەلسىز Kloop باسىلىمىنىڭ قىرعىز تىلىندەگى سايتى بۇعاتتالدى
ەكس-مينيستر ايەلىن ساباپ ءولتىردى دەگەن كۇدىكپەن ۇستالدى